Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 344 Hüküm no: 370 Orijinal metin no: [50b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Mustafa Çelebi b. Mehmed’in Molla Hüsrev Camii Vakfı’na ait olup harap durumda olup kendi mülkü olmak üzere yeniden yaptırdığı menzile yaptığı masrafların tespiti Bâ-imzâ-i Keşşâf Mehmed Said Efendi Husûs-ı âti’l-beyânın mahallinde keşf ve tahmîn ve takvîmi bâbında sâdır olan fermân-ı celîlü’ş-şâna imtisâlen taraf-ı şer‘den irsâl olunan Mevlânâ Ali Efendi hâssa mi‘mârlardan Mehmed Halîfe b. Ali ve Ali Halîfe b. Abdullah ile mahmiye-i İstanbul’da Hoca Üveys Mahallesi sükkânından es-Seyyid Mustafa Çelebi b. Mehmed’in zikri câʻî menziline varıp zeyl-i kitâbda mektûbü’l-esâmî ebniye ve sukūf ahvâline ıttılâ‘-ı tammı olan Müslimîn huzûrunda akd-i meclis-i şer‘-i nebevî eyledikde mezkûr es-Seyyid Mustafa Çelebi meclis-i ma‘kūd-ı mezkûrda zikri âtî vakfa mütevellî olup mahmiye-i mezkûrede Sofular Mahallesi’nde vâki‘ Molla Hüsrev Câmi‘-i şerîfi’nde imâm olan İbrahim Efendi b. Mustafa hâzır olduğu hâlde takrîr-i kelâm ve tâʻbir ani’l-merâm edip ashâb-ı hayrâtdan Kapıcı Abdi Dede nâm sâhibü’l-hayrın gallesini zikri mürûr eden Molla Hüsrev Câmi‘-i şerîfi’nde imâm ve müezzin ve kayyûm olanlara ve tevliyeti câmi‘-i mezkûrun ancak imâmına meşrûta vakfı olup zikr olunan Hoca Üveys Mahallesi’nde vâki‘ üç tarafdan Çaşnigîr Osman Ağa Vakfı’ndan olan menziller ve türbe ve bir tarafdan tarîk-i âm ile mahdûd büyût-ı adîdeyi müştemil menzil mürûr-ı eyyâm ve kürûr-ı şühûr ve a‘vâm ile harâb ve mâil-i türâb olup kābil-i süknâ olmayıp ve ta‘mîr ve termîme taraf-ı vakfda dahi müsâ‘ade olmamağla bin doksan yedi târihinde câmi‘-i mezkûra imâm ve ber-vech-i muharrer mütevellî olan Abdüllatif Efendi mâlım ile mülküm olmak üzere binâya bana izin vermekle ben dahi mâlım ile mülküm olmak üzere binâ edip ol târihde keşf ve masrûfum tahmîn ve takvîm olundukdan sonra hüccet-i mezkûre bundan akdem vâki‘ olan Sarrachâne ihrâkında muhterik olmağla hâlâ keşf ve masrûfum tahmîn ve takvîm olunmak matlûbumdur dedikde mi‘mârân-ı mezkûrân mesâha ve tahmîn ve takvîm eyledikleri üzere tûlen yirmi dört ve arzen on dört bi-hesâb-ı terbî‘î üç yüz otuz altı zirâ‘ sakfın zirâ‘ı otuzar akçeden on bir bin seksen akçe ve bi-hesâb-ı mezkûr yüz kırk üç zirâ‘ tavanın zirâ‘ı otuzar akçeden dört bin iki yüz doksan akçe ve bi-hesâb-ı mezkûr iki yüz otuz bir zirâ‘ tahta döşemenin zirâ‘ı otuz ikişer akçeden yedi bin üç yüz doksan iki akçe ve bi-hesâb-ı mezkûr iki yüz zirâ‘ dolma duvarın zirâ‘ı otuzar akçeden altı bin akçe ve bir ocak ma‘a davlunbaz altı yüz akçe ve bir Arabî kanadlı sandık dolap ve masandıra ve kemer kapı sekiz yüz elli akçe ve çıkrıkçı işi parmaklık ve tahtadan kanad ma‘a cam ve çârçûbe sekiz yüz elli akçe ve yedi pencere ikişer yüz ellişer akçeden bin yedi yüz elli akçe ve altı çift duvar camı yetmişer akçeden dört yüz doksan akçe ve bi-hesâb-ı mezkûr yirmi beş zirâ‘ gülvi? onar akçeden iki yüz elli akçe ve bir münakkaş Arabî kanadlı sandık dolap iki yüz elli akçe ve bir Arabî kanadlı kapı yüz yirmi akçe ve bir sagīr masandıra ma‘a boya ve dolap ve kapı dört yüz yirmi akçe ve on zirâ‘ nîm şişeli sülügen boyalı tahta perdenin zirâ‘ı otuzar akçeden dört yüz elli akçe ve on altı zirâ‘ sâde tahta perde yirmişer akçeden üç yüz yirmi akçe ve on bir kademeli bir nerdübân dört yüz elli akçe ve sokak tarafında taşı mevcûd bi-hesâb-ı mezkûr elli beş zirâ‘ taş duvarın zirâ‘ı kırkar akçeden iki bin iki yüz akçe ve iki pencere demiri yüz yirmi akçe ve on altı zirâ‘ sâde tahta perde yirmişer akçeden üç yüz yirmi akçe ve etrâfı tahta bir kenîf dört yüz akçe ve sekiz zirâ‘ sâde tırabzan otuzar akçeden iki yüz yirmi akçe ve bir masandıra ve iki dolap dört yüz elli akçe ve bir kapı yüz yirmi akçe ve üç pencere ma‘a çârçûbe ve parmaklık altı yüz akçe ve bir çift duvar camı yüz altmış akçe ve on beş zirâ‘ gülvi? onar akçeden yüz elli akçe ve altı zirâ‘ tahta döşeme iki yüz yetmiş akçe ve bir İznikmid topacı seksen akçe ve üç beylik taban yüz beş akçe ve etrâfı dolma duvar münakkaş Bağdâdî tavan ma‘a kapı ve cam ber-vech-i tahmîn sekiz yüz elli akçe ve iki çeşme ma‘a kubûr bin iki yüz akçe ve bir çamur duvarlı [51a] mahzen ber-vech-i tahmîn iki bin akçe ve bahçede olan parmaklık ber-vech-i tahmîn üç yüz on iki akçe ve on zirâ‘ havâle tahtası iki yüz on akçe ve müceddeden otuz beş zirâ‘ kâriz yolu ma‘a kapak seksener akçeden iki bin sekiz yüz akçe ve kapı bileziği tahtında ot taşından bir taban ma‘a sakf ve tahtadan bilezik ber-vech-i tahmîn dört yüz elli akçe ve yirmi beş zirâ‘ kaldırım on ikişer akçeden üç yüz akçe ve on kademeli bir nerdübân beş yüz elli akçe ve bi-hesâb-ı mezkûr otuz dokuz zirâ‘ nîm şişeli sülügen boyalı tahta perde ma‘a tavan otuzar akçeden bin yüz yetmiş akçe ve çıkrıkçı işi parmaklık ve tahta kanadlı dört pencere ma‘a cam sekiz yüz akçe ve on altı zirâ‘ gülvi? onar akçeden yüz altmış akçe ve bir masandıra ma‘a dolap üç yüz akçe ve dört Akçaşehir oluğu üç yüz yirmi akçe ve iki ocak ma‘a depe altı yüz akçe ve bir sokak kapısı bin akçe ki cem‘an ebniye-i mezkûre ber-vech-i meşrûh ancak elli iki bin sekiz yüz doksan dokuz akçe ile husûle gelir deyü mi‘mârân-ı mezkûrân ile Müslimîn-i mezbûrîn icmâ‘ ve ittifâk eylediklerini mevlânâ-yı mezkûr mahallinde ketb ü tahrîr edip ba‘dehû ma‘an ba‘s olunan el-Hâc Hüseyin b. Abdullah ve diğer Hüseyin b. Hasan ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 15 min-Cumâdelâhire sene 1121 Şuhûdü’l-hâl: Mustafa Efendi b. Veli el-İmâm, İsmail Efendi b. eş-Şeyh Mustafa Efendi, İmâmzâde Mehmed Efendi, el-Hâc Yusuf b. Abdullah, Ahmed Efendi b. Abdullah Hoca-i mekteb, İbrahim Çavuş b. Mehmed, es-Seyyid Ahmed Çelebi b. Mustafa, Hasan Çelebi b. Osman, el-Hâc Ali b. Abdullah, es-Seyyid Mehmed Çelebi b. İbrahim, Ali Çelebi b. Mehmed, es-Seyyid Mehmed Çelebi b. Hasan, Mustafa Çelebi b. Veli, Yusuf Efendi b. Abdullah Müezzin-i Câmi‘-i Sofular, Ahmed Çelebi b. Mustafa ve gayruhum mine’l-huzzâr.