Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 342 Hüküm no: 369 Orijinal metin no: [50a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Râbia Hatun bt. Mehmed’in vârisi kardeşi Hasan Ağa’nın vefât eden azatlı cariye Ayşe bt. Abdullah b. Abdurrahman’ın terekesinden hisse talebiyle Ayşe’nin vârisi Ahmed Çelebi b. Resul’e açtığı davanın reddedildiği İmzâ-i hazreti’l-efendi Vilâyet-i Rumeli’nde Eğriboz kasabasında sâkine iken bundan akdem vefât eden Râbia bt. Mehmed b. Ahmed’in li-ebeveyn karındaşı ve hasran vârisi olduğu sâbit ve mütehakkık olan Hasan Ağa nâm kimesne dîvân-ı hazret-i sadr-ı aʻzamîde ma‘kūd mahfil-i kazâda müteveffât-ı mezbûre Râbia’nın mu‘takası olup mahrûse-i Galata’da Sarı Lütfi Mahallesi’nde sâkine iken vefât eden Âişe bt. Abdullah b. Abdurrahman’ın verâseti zevc-i metrûku Fazlı Beşe b. Ali ile velâ-i ıtâka cihetinden verâseti mezbûr Hasan Ağa’ya münhasıra [50b] olduğu mütehakkık oldukdan sonra mezbûr Fazlı Beşe dahi fevt olmağla li-ebeveyn ammi oğlu ve terekesine vâzı‘u’l-yed olan işbu râfi‘u’l-kitâb Ahmed Çelebi b. Resul nâm kimesne mahzarında üzerine da‘vâ ve takrîr-i kelâm edip mezbûr Fazlı Beşe hayâtında mûrisem mezbûre Âişe’nin terekesinden olup zikr olunan Sarı Lütfi Mahallesi’nde vâki‘ bir tarafdan İbrahim Beşe menzili ve bir tarafdan Halil b. Ali menzili ve bir tarafdan Hayyât Ahmed menzili ve bir tarafdan tarîk-i âm ile mahdûd büyûtu müştemil mülk menzili ve kezâlik terekesinden üç çift beledî yasdık ve üç minder ve iki köhne yan keçesi ve iki kilim ve bir döşek ve üç köhne yemenî yorgan ve iki tencere ve bir tâbe ve üç sahan ve bir tepsisini kabz edip menzil-i mezkûrdan ve eşyâ-i mezkûreden nısf hissemi bana kable’t-teslîm mezbûr Fazlı Beşe fevt olmağla terekesine vâzı‘u’l-yed olan mezbûr Ahmed’e suâl olunup mârru’z--zikr menzil ve eşyâdan nısf hisse-i irsiyyemi bana teslîme tenbîh olunmak matlûbumdur dedikde gıbbe’s-suâl mezbûr Ahmed cevâbında müteveffât-ı mezbûre Âişe yedimde olan hüccet nâtıka olduğu üzere bin yüz on dokuz senesi Safer’inin altıncı günü sıhhat ve nefâz-ı tasarrufâtında menzil-i mezkûr ile eşyâ-i mezkûreyi bi-safkatin vâhidetin zevci mezbûr Fazlı Beşe’ye otuz guruşa bey‘ ve teslîm ol dahi baʻde’l-iştirâ ve’t-tesellüm semeni olan meblağ-ı mezbûru zevci mezbûr Fazlı Beşe’ye cihet-i karzdan ol mikdâr deyni olmağla takās ol dahi mukāssa ve kabûl etmişidi <> deyü def‘le mukābele edicek isre’l-istintak ve’l-inkâr mezbûr Ahmed’den def‘-i mezkûruna beyyine taleb olundukda udûl-i Müslimînden olup mârru’z--zikr Sarı Lütfi Mahallesi’nden es-Seyyid Süleyman Çelebi b. es-Seyyid Mehmed ve Şa‘ban b. Mehmed nâm kimesneler li-ecli’ş-şehâde mahfil-i kazâya hâzırân olup isre’l-istişhâd fi’l-hakīka müteveffât-ı mezbûre Âişe bt. Abdullah b. Abdülmennan hüccet-i mezkûre nâtıka olduğu üzere bin yüz on dokuz senesi Safer’inin altıncı günü sıhhat ve nefâz-ı tasarrufâtında menzil-i mahdûd-ı mezkûr ile eşyâ-i mezkûresini bi-safkatin vâhidetin zevci müteveffâ-i mezbûr Fazlı Beşe b. Ali’ye otuz guruşa bizim huzûrumuzda bey‘ ve teslîm ol dahi ber-vech-i muharrer baʻde’l-iştirâ ve’t-tesellüm semeni olan meblağ-ı mezbûru mezbûre Âişe zimmetinde hakkı olan cihet-i karzdan otuz guruşa takās mezbûre Âişe dahi mukāssa ve kabûl eyledi biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince müdde‘î-i mezbûr Hasan Ağa bî-vech mu‘ârazadan men‘-birle mâ-vaka‘a bi’t-taleb ketb olundu. Fî-gurreti Cumâdelâhire sene 1121 Şuhûdü’l-hâl: Mustafa Beşe b. Hüseyin, el-Hâc Mustafa Efendi tâbi‘-i efendi, İbrahim b. Mehmed, Ali b. Mehmed, Mehmed b. Mustafa, Mahmud Efendi el-İmâm ve gayruhum mine’l-huzzâr.