Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 347 Hüküm no: 373 Orijinal metin no: [51a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. David v. Tatos’un Divriği’nin Zamara köyündeki bağı ile tarlasını Agop v. Haçok’a sattığı Vilâyet-i Anadolu’da Divriği kazâsına tâbi‘ Zamara nâm karye sükkânından olup mahmiye-i İstanbul’da müsâferet vechi üzere sâkin David v. Tatos nâm zimmî mahfil-i kazâda işbu râfi‘u’s-sifr Agop v. Haçok nâm zimmî muvâcehesinde ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup karye-i mezbûrede vâki‘ bir tarafdan Ağya nâm zimmî bağı ve bir tarafdan Kirkor nâm zimmî bağı ve bir tarafdan Karabet nâm zimmî bağı ve bir tarafdan tarîk-i âm ile mahdûd tahmînen sekiz dönüm bağımı mezbûr Agop’a yirmi guruşa bey‘ ve temlîk ve yine karye-i mezbûre toprağında vâki‘ bir tarafdan müşteri-i mezbûr tarlası ve bir tarafdan mezbûr Karabet tarlası ve iki tarafdan tarîk-i âm ile mahdûd tahmînen yarım keyl tohum istî‘âb eder tarlamı bâ-ma‘rifet-i sâhib-i arz mezbûr Agop’a yirmi guruş bedel mukābelesinde ferağ ve tevfîz ol dahi ber-vech-i muharrer tefevvüz ve kabûl eylediğinden sonra semen-i mezbûr ile bedel-i merkūm cem‘an kırk guruşu mezbûr Agop yedinden tamamen ahz u kabz eyledim baʻde’l-yevm bağ-ı mahdûd-ı mezkûr mezbûr Agop’un mülk-i müşterâsı ve sâlifü’z-zikr tarla hakk-ı müfevvazı olup mezbûr Agop’u mahallinde zabta taslît eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 15 min-Cumâdelâhire sene 1121 Şuhûdü’l-hâl: Ekmekçi Hasan Çelebi b. ( ), Mustafa Çelebi b. Şa‘ban, Hasan Çelebi b. Abdullah, Hasan b. Mustafa ve gayruhum mine’l-huzzâr. Begos v. Gaspar, Ohan v. Konan, Aknaros Varnik.