Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 348 Hüküm no: 374 Orijinal metin no: [51a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kiremitçi esnafının horasancı dükkanı açmalarına izin verilmediği Mahmiye-i İstanbul’da olan horasancı tâifesinin kethüdâları Agop v. Nikagos ve ihtiyârlarından Simaven v. Begos ve Mesail v. Asvader ve Ağya v. Tomas ve Mardiros v. Agop nâm zimmîler meclis-i şer‘-i şerîf-i enverde hâlâ Kiremitçiler kethüdâsı el-Hâc Mehmed b. Mustafa ve ihtiyârlarından Osman Ağa b. Mehmed ve Hüseyin Ağa b. Mehmed ve Ali Çelebi b. Mehmed ve İsmail Çelebi b. Mehmed nâm kimesneler ile Yani v. Asvader ve Tatos v. Kanos [51b] ve Arakil v. Karabet nâm zimmîler muvâcehelerinde takrîr-i da‘vâ ve tasvîr-i müdde‘â edip merhûm ve mağfûrun-leh Ebu’l-feth Sultan Mehmed Hân aleyhi’r-rahmetü ve’r-rıdvân hazretlerinin zamânından ebniye-i hümâyûna ve cevâmi‘ ve mesâcide ve sâir ibâdullâha bulunmak üzere kırk horasancı kârhânesi olup ziyâde ve noksan olmamak üzere yedimizde olan emr-i şerîf-i vâcibü’l-imtisâlde tasrîh ve ta‘yîn olunup ve bu ana gelince dahi horasancı kârhânesi ihdâs olunmayıp hâlâ mezkûrûn horasancı kârhânesi ihdâs etmek murâd etmeleriyle hâlâ fermân-ı celîlü’ş-şâna nazar ve horasancı kârhânesi ihdâs etmekden mezkûrûn kiremitçi tâifesi men‘ u def‘ olunmak matlûbumuzdur dediklerinde mezkûrûn horasancı tâifesinin yedlerinde olan emr-i şerîfe nazar olundukda fi’l-vâki‘ Ebu’l-feth Sultan Mehmed Hân zamânında verilen emr-i hümâyûnda ebniye-i hümâyûna ve sâir cevâmi‘ ve mesâcide ve ibâdullâha bulunmak üzere kırk horasancı kârhânesi olup ziyâde ve noksan olmamak üzere tasrîh ve ta‘yîn olunduğu mastûr ve musarrah olduğundan mâ‘adâ hâlâ dahi vech-i meşrûh üzere fermân sâdır olmağın mezkûrûn kiremitçi tâifesine ber-mûceb-i fermân-ı âlî horasancı kârhânesi ihdâs etmemek üzere kıbel-i şer‘den dahi tenbîh-birle mâ-hüve’l-vâki‘ bi’t-taleb ketb olundu. Fî 3 min-Cumâdelâhire sene 1121 Şuhûdü’l-hâl: Mustafa Efendi Kethüdâ, Mehmed Çelebi b. Abdi Kethüdâ-yı muhzırân, Mustafa Çelebi b. Şa‘ban, İbrahim Çelebi b. Ahmed ve gayruhum mine’l-huzzâr.