Üsküdar Mahkemesi 9 Numaralı Sicil (H. 940-942 / M. 1534-1536) cilt: 4, sayfa: 248 Hüküm no: 583 Orijinal metin no: [68b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Yusuf b. İsmail’in para vakfettiği Sebeb-i tahrîr-i sicil budur ki Kasaba-i Üsküdar kurbunda karye-i Nerdübanlı’dan Yusuf b. İsmail fevt olup kısmetine şürû‘ olundukda vârislerinden Şaban b. İsmail takrîr-i merâm kılıp eyitdi ki işbu karındaşım müteveffâ Yusuf hâl-i hayâtında ve kemâl-i sıhhatinde iki bin akçe vakf edip ve malından dahi ifrâz edip karye-i mezbûre mescidine imâm kim olursa iki günde bir cüz’ kırâ’at edip zikr olan meblağ mu‘âmele-i şer‘iyye olunup hâsıl olan ribhin imâm-ı mezbûr alıp iki günde bir cüz’ Kelâm-ı Kadîm’den kırâ’at ede ve mütevellî olan kimesneye her senede ribh-i mezkûrdan yirmi akçe ta‘yîn eyledi bu sûret üzre şart eyledi deyicek udûl-i müslimîn ve bâkī vârisler tasdîk ile ve şehâdetleri ile sıhhat-i vakfa hükm olunup mâ hüve’l-vâkī‘ vukū‘ üzre tescîl olundu. Tahrîren fî evâhiri Zilhicce sene 941. Şuhûdü’l-hâl: Mustafa Çelebi b. Hacı Bey ve Korucu Hacı b. Abdullah ve Bâli b. Aslıhan ve Hızır b. Ahmed ve İvaz b. Halîfe Şâzî ve Süleyman Halîfe b. Mehmed ve gayruhüm.