Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 357 Hüküm no: 386 Orijinal metin no: [53a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dersiâm Şeyh Mustafa Efendi nukud vakfının mütevellî kaymakamı Ahmed Efendi b. Şeyh Mehmed Efendi vakfın bir önceki kaymakamı Ahmed Ağa b. Hacı Abdülkadir’den vakfa ait para, temessük ve hüccetleri teslim aldığı Merhûm Dersi‘âm eş-Şeyh Mustafa Efendi nâm sâhibü’l-hayrın nukūd-ı mevkūfesine kāimmakām-ı mütevellî olan Ahmed Efendi b. el-merhûm Şeyh Mehmed Efendi meclis-i şer‘-i şerîf-i enverde işbu bâ‘isü’l-kitâb Ahmed Ağa b. el-Hâc Abdulkādir mahzarında ikrâr ve takrîr-i kelâm edip babam mezbûr Şeyh Mehmed Efendi vakf-ı mezbûra evlâdiyet ve meşrûtiyet üzere mütevellî olup bundan akdem hayâtında hacc-ı şerîf’e âzim olduğunda merkūm Ahmed Ağa’yı yerine kāimmakām-ı mütevellî nasb u ta‘yîn ve Bezzâzistân-ı cedîd’de vâki‘ dolabda mevcûde olan mecmû‘u on bin dokuz yüz elli beş buçuk guruş olmak üzere nukūd ve rihân ve temessükât ve altı bin seksen dört buçuk guruşu nâtıka zâyi‘ât hüccetleri ve temessüklerin bi’l-cümle merkūm Ahmed Ağa’ya teslîm edip ba‘dehû esnâ-i tarîkde babam merkūm Şeyh Mehmed Efendi bi-emri’llâhi te‘âlâ vefât edip yerine şart-ı vâkıf üzere hemşîresi Râbia Hatun bt. el-vâkıfü’l-merhûm el-mezbûr Şeyh Mustafa Efendi mütevellî olup ben dahi kāimmakām-ı mütevellî nasb olunmağla merkūm Ahmed Ağa’nın pederim merhûm-ı mezbûrun yedinden makbûzu olan rihân ve nukūd ve temessükâtı ma‘rifet-i şer‘le tahrîr ve hesâb eylediğimizde merkūm Ahmed Ağa ber-mûceb-i defter on bin dört yüz altı buçuk guruşu nâtıka temessükât ve her bir temessüğün rihânını ve mevcûd olan beş yüz kırk dokuz guruşu ve altı bin seksen dört buçuk guruşu nâtıka zâyi‘ât temessükâtını ve hüccetlerini bi’l-cümle bana teslîm ben dahi kāimmakām-ı mütevellî olduğum ecilden ma‘rifet-i şer‘le bi-tamâmihâ yedinden ahz u kabz edip min-ba‘d gerek nukūd ve gerek temessükât ve gerek rihândan merkūm Ahmed Ağa yedinde bir şeyi bâkī kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 16 min-Cumâdelâhire sene 1121 Şuhûdü’l-hâl: Ali Efendi b. Mustafa Efendi, Mustafa Çelebi b. Şa‘ban, el-Hâc Ahmed Ağa b. el-Hâc Ömer, Abacıoğlu Ahmed b. Mustafa, Mahmud Odabaşı b. Mustafa ve gayruhum mine’l-huzzâr.