Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 358 Hüküm no: 387 Orijinal metin no: [53a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dersiâm Şeyh Mustafa Efendi vakfına evladından Râbia Hatun’un mütevelli, Ahmed Ağa b. Hacı Abdülkadir’in de nazır tayin edildiği Mahmiye-i İstanbul’da vâki‘ merhûm Dersi‘âm eş-Şeyh Mustafa Efendi nâm sâhibü’l-hayrın nukūd-ı mevkūfesine mütevellî olan yine vâkıf-ı mezbûrun sulbî oğlu eş-Şeyh Mehmed Efendi vefât edip yerine yine vâkıf-ı mezbûrun evlâdından Râbia Hatun şart-ı vâkıf üzere mütevellî ve müteveffâ-i mezbûrun sulbî oğlu Ahmed Efendi kāimmakām-ı mütevellî olup müteveffâ-i mezbûrun hayâtında kāimmakāmı olan işbu bâ‘isü’l-vesîka Ahmed Ağa b. el-Hâc Abdulkādir’in ma‘rifet-i şer‘le hesâbı ve kitâbı görülüp mecmû‘-ı makbûzu olan rihân ve nukūd ve temessükâtı hâlâ kāimmakām-ı mütevellî olan mezbûr Ahmed Efendi’ye bi’l-cümle teslîm edip nukūd-ı vakfa bir akçe ve bir habbe zarâr göstermeyip her vechile müstakīm ve dindâr ve emânetkâr kimesne olduğu lede’ş-şer‘i’l-enver zâhir ve müte‘ayyin olmağla hâkim-i muvakki‘-ı sadr-ı kitâb tûbâ-lehû ve hüsnü-meâb hazretleri merkūm Ahmed Ağa’yı vakf-ı mezbûra ber-vech-i hasbî nâzır nasb u ta‘yîn buyurduklarında ol dahi kabûl ve hizmet-i nezâret-i mezbûreyi kemâ-yenbagī edâya ta‘ahhüd ve iltizâm etmeğin mâ-hüve’l-vâki‘ bi’t-taleb ketb olundu. Fî 16 min-Cumâdelâhire sene 1121 Şuhûdü’l-hâl: Es-sâbikūn, es-sâbikūn, el-Hâc Mehmed b. Hüseyin, es-sâbikūn