Üsküdar Mahkemesi 9 Numaralı Sicil (H. 940-942 / M. 1534-1536) cilt: 4, sayfa: 260 Hüküm no: 621 Orijinal metin no: [73a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kasap Karaca b. Abdullah’ın borcu için vasî Ferrus b. Abdullah’a ev, bağ ve dükkânını verdiği Sicill-i Kasap Kaziyye budur ki Nefs-i Üsküdar’dan Kasap Karaca b. Abdullah İslâmbol’dan Ferrus b. Abdullah ile şer‘-i şerîf meclisine hâzırân olduklarında mezkûr Karaca bi’l-muvâcehe ikrâr ve i‘tirâf kılıp dedi ki mezkû[r] Ferrus’a yedi bin akçe vâcib-i kazâ lâzımü’l-edâ deynim olup hâliyâ taleb eylediğinde nefs-i Üsküdar’da mülkiyyet ile mutasarrıf olduğum bir evim hayat ile mahdûddur kıbleten İlyas mülküne ve şarkan Turâb[î] mülküne ve şimâlen tarîk-i âm ve garben kezâlik tarîk-i âm ve bundan gayrı mezkûr evim civârında tahmînen bir dönüm mikdârı bağım hudûd ınde’l-[a]hâlî ma‘lûmdur ve bundan gayrı bir kıt‘a bağım mahdûddur kıbleten tarîk-i âm ve şarkan kezâlik tarîk-i âm ve şimâlen Alagöz mülküne ve garben Na‘lband oğlu mülküne ve bundan gayrı çarşıda bir mülk dükkânım işbu hudûd-ı erba‘a ile mahdûd olan emlâkimi mezkûr Ferrus’a deynim için yedi bin akçeye verdim deyicek mukırr-ı mezbûru mukarrun lehü’l-mezkûr Ferrus vicâhen ve şifâhen tasdîk eyledikden sonra kaziyye mâ hüve’l-vâkī‘ mezkûr Ferrus talebiyle tescîl olundu. Cerâ zâlike ve hurrire fî 3 Saferi’l-muzaffer li sene 942. Şuhûdü’l-hâl: El-Hacı Süleyman b. el-Hacı Mustafa ve Behrâm b. Abdullah ve Mustafa b. Abdullah, Kılavuz b. Aslıhan, Mustafa b. Mehmed ve Hızır b. ( ) ve gayruhüm. Muhzır Mustafa havâle olunup tescîl olundu.