Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 363 Hüküm no: 392 Orijinal metin no: [54a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sekyas v. Mihail’in Kefeli Mahallesi’ndeki evini hanımı Sara bt. Begos’a satıp zimmetini ibra ettiği Mahmiye-i İstanbul’da Kefeli Mahallesi’nde sâkin Sekyas v. Mihail nâm zimmî meclis-i şer‘-i şerîf-i enverde zevce-i menkûhası işbu râfi‘atü’l-kitâb Sara bt. Begos nâm Nasrâniye mahzarında ikrâr-ı tâm ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahalle-i mezbûrede vâki‘ bir tarafdan baʻzan Aslan nâm zimmî ve baʻzan Mustafa Beşe nâm kimesne mülkleri ve bir tarafdan Kelâ? ve bir tarafdan baʻzan Müftî Hüseyin Efendi Vakfı ve baʻzan Mimâr Kasım Ağa Vakfı ve bir tarafdan tarîk-i âm ile mahdûd büyût-ı adîde ve su kuyusu ve kenîf ve zât-ı eşcâr-ı müsmire ve gayr-ı müsmire hadîkayı muhtevî mülk menzilimi bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile zevcem mezbûre Sara’ya bin elli guruşa bey‘ ve teslîm ve temlîk ol dahi ber-vech-i muharrer iştirâ ve tesellüm ve temellük ve kabz ve kabûl ettiğinden sonra semeni olan meblağ-ı mezbûr bin elli guruş mutâlebesinden zevcem mezbûre Sara’nın zimmetini ibrâ-i âmm-ı kātı‘u’n-nizâ‘la ibrâ ve iskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 19 min-Cumâdelâhire sene 1121 Şuhûdü’l-hâl: Ahmed Efendi b. Hüseyin el-İmâm, Müezzin Mahmud Efendi b. Mustafa, Abdülbâki Çelebi b. Ali, Mustafa Çelebi b. Şa‘ban ve gayruhum mine’l-huzzâr. Begos v. Ellez, Sergis v. Agop, Sahak v. Arzuman, Aritun v. Begos, Pali v. Nikogos, Sergis v. Begos, Abraham v. Asvader, Bağdasar v. Kirkor, Karabet Piyer, Rakel v. Avanis, Papa Mesruk v. David, Papa Kirkor v. Mesruk.