Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 361 Hüküm no: 391 Orijinal metin no: [53b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müderris Hacı Fethullah Efendi b. Mehmed Ağa’nın vefât eden kardeşi Hacı Murtaza ile babasının Çankırı valisi Polad Mehmed Paşazâde İsmail Paşa’da alacağı olduğu, İsmail Paşa’nın da Hacı Murtaza’daki alacak davalarında sulh olduktan sonra İsmail Paşa tarafından Hacı Fethullah Efendi’ye zarar verilmeyeceğinin tescil edildiği Vilâyet-i Anadolu’da Uzeyr sancağında Belen kasabası ahâlîsinden işbu râfi‘u’l-kitâb fahrü’l-müderrisîni’l-kirâm el-Hâc Fethullah Efendi b. Mehmed Ağa nâm kimesne mahfil-i kazâda hâlâ Kengiri vâlîsi olan Polad Mehmed Paşazâde İsmail Paşa’nın etbâ‘ından Mehmed Emin Efendi b. İshak ve İbrahim Ağa b. Mustafa ve Hatîbzâde Ali Çelebi b. Mehmed Efendi ve Başbâkīkulu ağanın başçukadârı Şişman Mustafa b. ( ) vekîl-i müsecceli İbrahim b. Ahmed nâm kimesneler mahzarlarında takrîr-i kelâm ve tâʻbir ani’l-merâm edip mezbûr İsmail Paşa’nın babası mezbûr Polad Mehmed Paşa hayâtında babam müteveffâ-i mezbûrun bir en‘âm-ı şerîf ve iki bin beş yüz guruş ve benim dahi altı yüz guruşumu bi-gayr-ı hakkın ahz u kabz edip ve mezbûr İsmail Paşa dahi karındaşım müteveffâ el-Hâc Murtaza’nın hayâtında dört yüz guruş ile seksen guruş kıymetli bir çadırını ve benim dahi elli guruş kıymetli bir mükemmel taht-ı revânımı ve karındaşın el-Hâc Murtaza’da bin otuz guruşum var idi deyü Belen kazâsında Cebel-i Navlı mâlikânesinden sülüs hissemi iki sene fuzûlen zabt edip bin üç yüz guruş mikdârı mahsûlünü kabz etmekle vekîli işbu hâzır bi’l-meclis Mehmed Emin Efendi b. İshak mahzarında zikr olunan husûsları kendi tarafından asâleten ve karındaşım mezbûr el-Hâc Murtaza’nın sagīre kızı Raziye’nin vasîsi ve benim vâlidem Şahnisa tarafından bi’l-vekâle da‘vâ eylediğimde muslihûn tavassutuyla üç yüz elli guruşa sulh ve bedel-i sulhü kabz ve târih-i kitâba gelince cemî‘ de‘âvî ve mutâlebâtdan her birimiz âharı ibrâ ve tarafeyne hüccet verilip lâkin ben paşa-yı mûmâ-ileyhden ve etbâ‘ından bana ve etbâ‘ıma ve emvâlime ve fellâhıma zarâr isâbet etmemek üzere kefîl olmaları ile suâl olunup takrîrleri tahrîr ve hüccet olunmak matlûbumdur dedikde gıbbe’s-suâl mezbûrlardan her biri fi’l-hakīka müşârun-ileyh el-Hâc Fethullah Efendi’nin kendiye ve etbâ‘ına ve mâlına ve hizmetinde olan fellâhına zarâr isâbet eder ise cümlemiz kefîl ve dâmin olup ve mezbûr Şişman Mustafa Ağa dahi cümlemize kefîl olmuşdur deyü her biri ikrâr u i‘tirâf eylediklerinden sonra mûmâ-ileyh İsmail Paşa tarafından husûs-ı âti’l-beyâna mûmâ-ileyh Fethullah Efendi’nin yedinde olan hüccet nâtıka olduğu üzere vekîl olduğu Mehmed Beşe b. Şa‘ban ve Yusuf b. Mehmed şehâdetleriyle sâbit olan mezbûr Mehmed Emin Efendi b. İshak nâm kimesne yine meclis-i şer‘de müşârun-ileyh Fethullah Efendi mahzarında bi’l-vekâle ikrâr ve takrîr-i kelâm edip paşa-yı müşârun-ileyhin mezbûr el-Hâc Murtaza zimmetinde beynlerinde ma‘lûm çiftlik eşyâsı bahâlarından sekiz kîse akçesi vardır deyü bi’l-vekâle da‘vâ etmişidim ben dahi vekâletim hasebiyle meblağ-ı mezbûr sekiz kîse akçeye ve çiftlik-i mezkûra ve târih-i kitâba gelince âmme-i de‘âvî ve mutâlebâtdan müşârun-ileyh Fethullah Efendi’nin ve vâlidesi Şahnisa’nın ve mezbûr Murtaza’nın kızı Raziye’nin zimmetlerini ibrâ-i âmm-ı kātı‘u’n-nizâ‘la ibrâ ve iskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 14 min-Cumâdelâhire sene 1121 Şuhûdü’l-hâl: İbrahim Çavuş, el-Hâc Mustafa Çavuş el-Mübâşir, İbrahim b. Mustafa, Ali b. Mehmed, İbrahim Ağa Kethüdâ-yı paşa, Mehmed b. Şa‘ban, Yusuf b. Mehmed, İbrahim Ağa b. Ahmed, [54a] el-Hâc Mustafa b. Ahmed, Osman Efendi Kîsedâr, Mustafa Ağa hazînedâr-ı sâbık, İbrahim Ağa kethüdâ-yı kapı, Mazman? Veli, es-Seyyid Hüseyin Ağa b. ( ), Mehmed Ağa Başbâkīkulu, Dağlı Ömer, İbrahim Beşe b. İlyas, Uzun Ebûbekir b. Davud, es-Seyyid Hasan b. Mehmed.