Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 364 Hüküm no: 394 Orijinal metin no: [54a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmügülsüm bt. Mustafa’nın geçinemedikleri kocası Halil b. Kasım’dan boşandığı Mahmiye-i İstanbul’da Tevkī‘î Ca‘fer Mahallesi’nde sâkine zâtı ta‘rîf-i şer‘î ile mu‘arrefe olan Ümmügülsüm bt. Mustafa nâm hatun mahfil-i kazâda zevc-i dâhili işbu râfi‘u’l-kitâb Halil b. Kasım nâm kimesne mahzarında ikrâr ve takrîr-i kelâm edip zevcim mezbûr ile beynimizde hüsn-i zindegānemiz olmamağla zimmetinde ve ma‘kūdün-aleyh olan dört bin yedi yüz akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr ile muhâla‘a-i sahîha-i şer‘iyye ile muhâla‘a eylediğimde ol dahi ber-minvâl-i muharrer hul‘-ı mezbûru kabûl eylediğinden sonra her birimiz hukûk-ı zevciyyete müte‘allıka âmme-i da‘vâdan âharın zimmetini ibrâ-i âm ile ibrâ ve iskāt eyledik dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fî 25 min-Cumâdelâhire sene 1121 Şuhûdü’l-hâl: Mustafa Çelebi b. Şa‘bân, Ali Çelebi b. İvaz, Hasan Çelebi b. Mustafa, Ali Çelebi b. Bali, Hasan Çelebi b. Abdullah ve gayruhum.