Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 364 Hüküm no: 395 Orijinal metin no: [54a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Mustafa’nın Yalvaç kazasının Hisarardı köyündeki değirmenini kardeşi Osman’a sattığı [Mühür:] Hasbiyallâhü vahdehû ve tekā? Abdühû Ali Vilâyet-i Anadolu’da Hamid sancağında Yalvaç kazâsına tâbi‘ Hisarardı nâm karye ahâlîsinden olup mahmiye-i İstanbul’da Derviş Ali Mahallesi’nde sâkin Ahmed b. Mustafa nâm kimesne meclis-i şer‘-i şerîf-i enverde li-ebeveyn karındaşı işbu râfi‘u hâze’l-kitâb Osman nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup karye-i mezbûrede vâki‘ Fındıklı nehri demekle ma‘rûf nehir üzerinde dâir lede’l-ahâlî ve’l-cîrân ma‘lûmü’l-hudûd iki göz mülk değirmenimi cemî‘ tevâbi‘ ve levâhıkıyla tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile karındaşım mezbûr Osman’a târih-i kitâbdan beş ay mukaddem yüz guruşa bey‘ ve temlîk eylediğimde ol dahi ber-vech-i muharrer iştirâ ve temellük ve kabûl eylediğinden sonra semeni olan meblağ-ı mezbûr yüz guruşu mezbûr Osman yedinden tamamen ahz u kabz etmişidim hâlâ zikr olunan değirmeni mahallinde zabt u tasarrufa karındaşım mezbûru taslît eyledim baʻde’l-yevm mârru’z--zikr değirmen karındaşım mezbûr Osman’ın mülk-i müşterâsı ve hakk-ı sırfı olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 25 <> min-Cumâdelâhire sene 1121 Şuhûdü’l-hâl: Mustafa Çelebi b. Şa‘ban, Mustafa Çelebi b. Mehmed, Ahmed b. Osman, Ali b. İvaz, Mehmed b. Ahmed, Mustafa Efendi b. Ali Paşa, Ali Ağa b. Miraç?, Hüseyin Efendi b. İbrahim, Mustafa b. İbrahim, Mehmed Çelebi b. İsmail, el-Hâc Ali ve gayruhum mine’l-huzzâr.