Üsküdar Mahkemesi 9 Numaralı Sicil (H. 940-942 / M. 1534-1536) cilt: 4, sayfa: 287 Hüküm no: 702 Orijinal metin no: [83a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yakob b. Nerses’in Hızır b. Ahmed’e hakaret ettiği Sebeb-i tahrîr-i sicil budur ki Hızır b. Ahmed şer‘-i şerîfe hâzır olup bilesine Yakob b. Nerses nâm zimmî ihzâr edip üzerine takrîr-i da‘vâ kılıp dedi ki mezkûr Yakob bana sen iki akçe ile yalan şehâdet edersin dedi deyicek mezkûr Yakob’dan istifsâr olundukda bi’l-mukābele inkâr eyledi gıbbe’l-inkâr müdde‘î-i mezbûrun da‘vâsına muvâfık beyyine taleb olundu udûl-i müslimînden Ali b. Musa, Hasan [b.] Yusuf şehâdet edip dediler ki biz şâhidleriz şehâdet dahi ederiz mezkûr Yakob nâm zimmî mezkûr Hızır’a sen iki akçe ile yalan yere şehâdet edersin dedi deyicek şehâdetleri ba‘de’t-tezkiyye hayyiz-i kabûlde vâkī‘ olup sicil olundu. Tahrîren fî gurreti Rebi‘ilevvel li sene isnâ ve erba‘în ve tis‘a mi’e. Şuhûdü’l-hâl: Mevlânâ Ramazan b. Ahmed ve kâtib el-Fakīr Mahmud.