Üsküdar Mahkemesi 9 Numaralı Sicil (H. 940-942 / M. 1534-1536) cilt: 4, sayfa: 289 Hüküm no: 709 Orijinal metin no: [84a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Cafer b. Yunus’un Mehmed Paşa İmareti’ne hamam mukataası borcu olmadığı Sebeb-i tahrîr-i sicil budur ki Mehmed Paşa İmâreti’ne mütevellî olan Şahkulu b. Abd[i] şer‘-i şerîfe hâzır olup bilesine nefs-i İslâmbol’dan Cafer [b.] Yunus ile imâret-i mezbûrun vekîl-i harcı Mustafa b. Musa şer‘-i şerîf-i Nebevî meclisine hâzır o[lu]p mezkûr mütevellî müşârün-ileyh Cafer üzerine takrîr-i da‘vâ kılıp dedi ki bundan akdem mezbûr Cafer’e yirmi bin akçeye bir hamam mukāta‘aya verilmişti yedi [yüz] akçesi mezbûrun zimmetindedir bâkīsin aldık hâliyâ yedi yüz taleb ederiz deyicek mezkûr Cafer’den istifsâr olundukda bi’l-mukābele cevâb verip dedi ki meblağ-ı mezbûru bî-kusûr teslîm eyledim andan sonra mezbûr vekîl-i harc ağırlık deyû altı yüz akçem aldı deyicek mezbûr vekîl-i harc olan Mustafa’dan istifsâr olundukda bi’l-mukābele cevâb verip aldım amma yirmi bin içinden aldım deyicek mezkûr Cafer’in da‘vâsına muvâfık beyyine taleb olundu beyyine[den] âciz olıcak mezkûr Mustafa’ya yemîn müteveccih olup mezkûr Cafer’den ağırlık deyû almadığına yemînden nükûl edicek hükm olunup sicil olundu. Şuhûdü’l-hâl: Mustafa b. Abdullah, Hacı Süleyman b. Abdullah, muhzır Hızır b. Ahmed, Ali Çelebi b. Emir ve gayruhüm.