Üsküdar Mahkemesi 9 Numaralı Sicil (H. 940-942 / M. 1534-1536) cilt: 4, sayfa: 290 Hüküm no: 710 Orijinal metin no: [84b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Paşa İmareti’nin hamamını mukataaya tutan Cafer b. Yunus’un vakfa borcunun kalmadığı Sebeb-i tahrîr-i sicil budur ki Mehmed Paşa evkāfına mütevellî olan Şahkulu b. Abdi ve evkāf-ı mezbûreye câbi olan Mahmud ve vekîl-i harc olan Mustafa şer‘-i şerîf meclisine hâzırûn olup bilelerince merhûmun İslâmbol’da vakıf hamamın mukāta‘aya alan Cafer b. Yunus ve mezbûra kefîl bi’l-mâl olan Ahmed b. Mustafa ihzâr edip mezkûrûn mütevellî ve câbi ve vekîl-i harc bi’t-tav‘ ve’r-rızâ bilâ-icbâr ve lâ-ikrâh ikrâr ve i‘tirâf kılıp dediler ki bundan akdem mahrûse-i İslâmbol’da Mehmed Paşa hamamı demekle ma‘rûf hamamı ihdâ senesinde mezkûr Cafer’e yirmi bir bin akçe mukāta‘aya vermiştik yirmi bin üç yüz akçesin aldık yedi yüz akçe zimmetinde bâkīdir hâliyâ taleb ederiz deyicek mezkûr Cafer’den istifsâr olundukda bi’l-mukābele cevâb verip dedi ki vakıf[tan] yirmi bir bin akçe mukāta‘aya hamam aldım yirmi bin üç yüz akçesin verdim andan sonra mütevellîye ağırlık deyû vekîl-i harc olan Mustafa nâm kimesne beş yüz akçem dahi aldı ba‘dehu câbi ağırlığı deyû seksen akçem yine aldı deyicek mezbûr vekîl-i harc olan Mustafa’dan istifsâr olundukda bi’l-mukābele cevâb verip dedi ki mezbûr Cafer’den akçe aldım amma yirmi binden aldım ağırlık deyû almadım deyicek müdde‘î-i mezbûr Cafer’in da‘vâsına muvâfık beyyine taleb olundu beyyineden âciz olıcak müdde‘î-i mezbûr Mustafa ağırlık deyû beş yüz seksen akçe almadığına bi hasebi’ş-şer‘ yemîn müteveccih olup yemînden nükûl ettikden sonra beş yüz seksen akçe dahi mezbûrun deynin geçip kaziyye mâ hüve’l-vâkī‘ mezbûrûn talebleriyle sicil olundu. Tahrîren fî evâili Rebi‘ilevvel sene isnâ ve erba‘în ve tis‘a mi’e. Şuhûdü’l-hâl: Mustafa b. Abdullah, el-Hâc Süleyman b. Abdi, Hızır b. Ahmed, Ali Çelebi b. Emir, Mustafa Bey b. Abdullah ve gayruhüm.