Üsküdar Mahkemesi 9 Numaralı Sicil (H. 940-942 / M. 1534-1536) cilt: 4, sayfa: 295 Hüküm no: 720 Orijinal metin no: [86b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kutbeddin’in yaptığı dolabın ayıplı olduğu Sebeb-i tahrîr-i sicil budur ki Müezzin Kutbeddin meclis-i şer‘a gelip bilesine Eşref b. Hacı Ali ihzâr edip üzerine takrîr-i da‘vâ kılıp dedi ki mezkûr Eşref’e yirmi dört arşın bir dolabı beş yüz elli akçeye kavl edip yapıp verdim meblağ-ı mezbûrdan zimmetinde yüz seksen akçem kaldı hâliyâ taleb ederim deyicek mezkûr Eşref’ten istifsâr olundukda bi’l-mukābele cevâb verip dedi ki beş yüz elli akçeye dolap aldım amma yirmi beş karıştır deyû verdi yirmi bir karış geldi kabûl eylemezin deyicek mezkûr dahi benden dolabı alıp yirmi bir karış idiğin bildikden sonra hizmetlendi deyicek mezkûr Eşref dahi yirmi bir karış idiğin bildikden sonra hizmetlendiğin ikrâr eyledikden sonra mebî‘-i mezbûrun kusûru mezkûr müezzin Kutbeddin’e hükm olup sicil olundu. Tahrîren fî evâili Rebi‘ilevvel li sene isnâ ve erba‘în ve tis‘a mi’e. Şuhûdü’l-hâl: Kılavuz b. Aslıhan ve kâtibü’l-hurûf.