Üsküdar Mahkemesi 9 Numaralı Sicil (H. 940-942 / M. 1534-1536) cilt: 4, sayfa: 296 Hüküm no: 724 Orijinal metin no: [87a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kara b. Todora’nın Yani’ye verdiği fundaları istemesi Sebeb-i tahrîr-i sicil budur ki Kara b. Todora meclis-i şer‘a gelip bilesine Yani b. ( ) nâm zimmî[yi] ihzâr edip üzerine takrîr-i da‘vâ kılıp dedi ki bundan akdem mezkûr Yani’ye iki bin sekiz yüz funda verdim hâliyâ taleb ederim deyicek mezkûr Yani’den istifsâr olundukda bi’l-mukābele inkâr eyledi gıbbe’l-inkâr müdde‘î-i mezbûrun da‘vâsına muvâfık beyyine taleb olundukda zimmîlerden Alavud b. Keremidin ve Vasil b. Kabeşiz şehâdetleriyle sâbit oldukdan sonra mezkûr iki bin sekiz yüz funda mezbûr Kara’ya hükm olunup sicil olundu. Tahrîren fî evâili Rebi‘ilevvel li sene 942. Şuhûdü’l-hâl: Mâ sebak.