Üsküdar Mahkemesi 9 Numaralı Sicil (H. 940-942 / M. 1534-1536) cilt: 4, sayfa: 309 Hüküm no: 760 Orijinal metin no: [93a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Çeşme’de bulunan padişah haslarından para çalanların takibi konusunda ferman Sûret-i hükm-i Sultânî Mefâhirü’l-kuzât ve’l-hükkâm me‘âdinü’l-fezâ’il ve’l-kelâm havâlî-i Anadolu kadıları -dâme fazluhüm- tevkī‘-i refî‘-i hümâyûn vâsıl olıcak ma‘lûm ola ki hâliyâ kazâ-і Çeşme’de vâkī‘ olan hâslarım emîni olan mefharü’l-e[mâ]sil kulum İbrahim’in Ahmed nâm karındaşı ve Hasan ve İskender nâm hizmetkârları kazâ-i mezbûrda olan hâsslarımdan emîn-i mezbûr cem‘ ettiği malımdan dört yüz elli filori ve dokuz bin üç yüz nakid akçe ve mezkûr kulumun üç re’s atların ve iki kılıçların ve kaftanların ve yirmi beş zirâ‘ kadifesin ve nice dahi esbâbın alıp gaybet ettikleri südde-i sa‘âdetime arz olunduğu ecilden bu hükm-i şerîfimle müşârün-ileyh İbrahim ve iki hizmetkârı ile ulağiyle gönderdim ve buyurdum ki mezbûrûn her kangınızın taht-ı kazâsında bulunursa ellerinde olan malımı ve bulunan atların ve esbâbları bî-kusûr ve lâ-küsûr mûmâ-ileyh kuluma teslîm edip ve mezbûrûn[u] te’hîr ve tevakkuf etmeyip bî-mecâl salb ettirip ve kaziyyeyi alâ vukū‘ihi yazıp bu cânibe bildiresiz ve mezbûrûnun ele getir[il]meleri bâbında siz ki sancak subaşıları ve âyân-ı vilâyet ve teb‘a-i memleket ve il erleri ve kethüdâlarısız bulundukları yerde mezbûr kuluma gere[ği] gibi mu‘âvenet ve müzâheret edip üzerlerine varasız elbette envâ‘-ı ikdâm ve ihtimâm edesiz ve mezbûr kuluma menâzilde ve merâhilde ve bi’l-cümle ulak lâzım olan yerlerde yarar ulak verip kat‘â özr ü bahâne ve avk u te’hîr etmeyesiz şöyle bilesiz alâmet-i şerîfe i‘timâd kılasız. Tahrîren fî evâsıtı Rebi‘ilevvel li sene isnâ ve erba‘în ve tis‘a mi’e. Be Makām-ı Manisa.