Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 375 Hüküm no: 407 Orijinal metin no: [56a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Markor v. Norsiz’in fırın hissesini sattığı Karabet v. Kumru’daki alacağının ödenmesi; anlaşamadıkları miktar için de Markor’a iddiasını ispat için süre verildiği Mahmiye-i İstanbul’da Dörtyolağzı’nda vâki‘ ekmekçi fırınında sâkin ekmekçi tâifesinden işbu bâ‘isü’s-sifr Markor v. Norsiz nâm zimmî meclis-i şer‘-i şerîf-i enverde Karabet v. Kumru nâm zimmî muvâcehesinde üzerine da‘vâ ve takrîr-i kelâm edip bundan akdem bey‘ eylediğim zikri mürûr eden ekmekçi fırınında olan beş sümün hisse-i şer‘iyyem semeninden bâkī mezbûr Karabet zimmetinde elli altı guruş hakkım olup hâlâ meblağ-ı bâkī-i mezbûr elli altı guruşu mezbûr Karabet’den taleb ve da‘vâ eylediğimde edâdan imtinâ‘ eder suâl olunup alıverilmesi matlûbumdur dedikde gıbbe’s-suâl mezbûr Karabet cevâbında fi’l-vâki‘ zikr olunan fırında olup mezbûr Markor’dan iştirâ ve kabz eylediğim beş sümün hisse kıymetinden bâkī meblağ-ı mezbûr elli altı guruş zimmetinde müdde‘î-i mezbûr Markor’a deyni olduğunu ikrâr lâkin meblağ-ı mezbûr elli altı guruşdan yirmi üç guruşunu müdde‘î-i mezbûr Markor’a def‘ ü teslîm edip hâlâ zimmetimde ancak otuz üç guruş deynim bâkī kaldı deyü def‘le mukābele edicek gıbbe’l-istintak ve akībe’l-inkâr mezbûr Karabet’den def‘-i mezkûrunu mübeyyine beyyine taleb olundukda ityân-ı beyyine için istimhâl etmeğin mehl-i şer‘î ile baʻde’l-imhâl ikrârı mertebesi olan meblağ-ı mezbûr otuz üç guruşu müdde‘î-i mezbûr Markor’a edâ ve teslîme mezbûr Karabet zimmîye tenbîh olunup mâ-hüve’l-vâki‘ bi’t-taleb ketb ü tahrîr olundu. Fî 23 min-Cumâdelâhire sene 1121 Şuhûdü’l-hâl: Receb b. Abdullah, Mehmed b. Abdurrahman, Hasan b. Abdullah, Ali Beşe b. Bâli, Mehmed Ağa b. Abdullah, Mustafa b. Şa‘ban, Abdullah b. Mustafa, Osman b. Mustafa, Ali Sofu b. Abdullah, Ali Çelebi b. İvaz, Süleyman b. Abdurrahim, Ömer b. el-Hâc Ahmed ve gayruhum mine’l-huzzâr.