Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 374 Hüküm no: 406 Orijinal metin no: [56a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmühani bt. Ahmed’in talebiyle boşandığı kocası İbrahim b. Hasan’ın ödemesi şartıyla küçük kızları Rukiye’ye nafaka takdir edildiği Mahmiye-i İstanbul’da Kürkçübaşı Mahallesi’nde sâkine olup zâtı ta‘rîf-i şer‘î ile mu‘arrefe olan Ümmühani bt. Ahmed nâm hatun meclis-i şer‘-i şerîf-i enverde takrîr-i kelâm ve tâʻbir ani’l-merâm edip zevc-i sâbıkım gāib ani’l-meclis İbrahim b. Hasan nâm kimesnenin firâşından hâsıla ve benden mütevellide bi-hakkı’l-hıdâne hâlâ hacr u terbiyemde olan sadriye sagīre kızım Rukiye’ye babası gāib-i mezbûr İbrahim üzerine kıbel-i şer‘den kadr-i ma‘rûf nafaka ve kisve-bahâ farz ve takdîr olunmak matlûbumdur dedikde hâkim-i muvakki‘-ı sadr-ı kitâb tûbâ-lehû ve hüsnü-meâb hazretleri dahi sagīre-i mezbûre Rukiye’ye târih-i kitâbdan beher yevm altışar akçe nafaka ve kisve-bahâ farz ve takdîr edip meblağ-ı mefrûz-ı mezbûru sagīre-i mezbûrenin levâzımına harc u sarfa ve lede’l-iktizâ istidâneye ve inde’z-zafer babası gāib-i mezbûr üzerine rücû‘a mezbûre Ümmühani Hatun’a kıbel-i şer‘den izin vermeğin mâ-vaka‘a bi’t-taleb ketb olundu. Fî 25 min-Cumâdelâhire sene 1121 Şuhûdü’l-hâl: Mustafa b. Şa‘ban, Ali b. İvaz, Abdullah b. Abdullah, Ali b. Bâli ve gayruhum mine’l-huzzâr.