Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 376 Hüküm no: 409 Orijinal metin no: [56b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Maksud b. Yusuf’un vârislerinden oğulları Ahmed ve Hüseyin’in babalarının alacağı olduğu iddiasıyla üvey anneleri Fâtıma bt. Hasan’a açtıkları davayı ispat edemedikleri Mahmiye-i İstanbul’da Ma‘cûnî Kasım Mahallesi’nde sâkin iken bundan akdem vefât eden Maksud b. Yusuf b. Abdullah nâm kimesnenin verâseti zevce-i metrûkesi Fâtıma bt. Hasan nâm hatun ile sulbî kebîr oğulları Ahmed ve Hüseyin ve sulbiye sagīre kızları Havvâ ve Hadice ve Âişe’ye münhasıra ve tashîh-i mes’elesi sekiz sehmden olup sihâm-ı mezbûreden bir sehmi zevcesi mezbûre Fâtıma’ya ve ikişer sehmi oğulları mezbûrândan herbirlerine ve birer sehmi kızları mezbûrâtdan her birine isâbet eylediği şer‘an zâhir ve müte‘ayyin oldukdan sonra mezbûrân Ahmed ve Hüseyin meclis-i şer‘-i şerîf-i enverde üvey vâlideleri olup zâtı ta‘rîf-i şer‘iyye ile mu‘arrefe olan mezbûre Fâtıma mahzarında her biri üzerine da‘vâ ve takrîr-i kelâm edip babamız müteveffâ-i mezbûr hayâtında üvey anamız mezbûre Fâtıma’ya mahalle-i mezbûre imâmına meşrûta menzili üzerine ferâgat ettirmek için elli guruş ve Kasım Çavuş Câmi‘i Vakfı olan menzili kezâlik yine ferâgat ettirmek için bedel-i ferağ yetmiş beş guruş ki cem‘an emriyle kendi mâlından bi-şartü’r-rücû‘ yüz yirmi beş guruş verip meblağ-ı mezbûru kable’l-ahz ve’l-istîfâ vefât etmekle meblağ-ı mezbûr ber-vech-i muharrer üvey vâlidemiz mezbûre Fâtıma zimmetinde kalmağın suâl olunup tashîh-i mezkûr üzere bizim hisse-i irsiyyemize isâbet eden altmış iki buçuk guruşun alıverilmesi matlûbumuzdur dediklerinde gıbbe’s-suâl ve akībe’l-inkâr müdde‘iyân-ı mezbûrândan müdde‘âlarını mübeyyine beyyine taleb olundukda ityân-ı beyyineden izhâr-ı acz edip istihlâf etmeğin fi’l-hakīka zevci müteveffâ-i mezbûr Maksud hayâtında zikri mürûr eden menzillerin bedel-i ferağı için ashâbına bi-şartü’r-rücû‘ kendi mâlından emriyle yüz yirmi beş guruş verip kable’l-ahz vefât etmekle meblağ-ı mezbûr yüz yirmi beş guruş zimmetinde ol vechile müteveffâ-i mezbûrun veresesine deyni olmadığına mezbûre Fâtıma’ya yemîn teklîf olundukda ol dahi hasbe’l-mesûl yemîn biʼllâhi’l-aliyyi’l-a‘lâ etmeğin mûcebince müdde‘iyân-ı mezbûrân bilâ-beyyine bî-vech mu‘ârazadan men‘-birle mâ-vaka‘a bi’t-taleb ketb olundu. Fî 14 min-Cumâdelâhire sene 1121 Şuhûdü’l-hâl: Mustafa b. Şa‘ban, Hasan b. Mustafa, Mehmed b. Ahmed, Ali b. Bâli, Ali b. İvaz, Receb b. Şa‘ban ve gayruhum mine’l-huzzâr.