Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 377 Hüküm no: 410 Orijinal metin no: [56b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Maksud b. Yusuf b. Abdullah’ın vârislerinden oğulları Ahmed ve Hüseyin’in terekedeki hisselerine karşılık üvey annelerinden on guruş alarak sulh oldukları Mahmiye-i İstanbul’da Ma‘cûnî Kasım Mahallesi’nde sâkin iken bundan akdem vefât eden Maksud b. Yusuf b. Abdullah nâm kimesnenin verâseti zevce-i metrûkesi Fâtıma bt. Hasan nâm hatun ile sulbî kebîr oğulları Ahmed ve Hüseyin ve sulbiye sagīre kızları Havvâ ve Hadice ve Âişe’ye münhasıra ve tashîh-i mes’elesi sekiz sehmden olup sihâm-ı mezbûrdan bir sehmi zevcesi mezbûre Fâtıma’ya ve ikişer sehmi oğulları mezbûrândan her birine ve birer sehmi kızları mezbûrâtdan her birine isâbet eylediği şer‘an zâhir ve müte‘ayyin oldukdan sonra mezbûrân Ahmed ve Hüseyin meclis-i şer‘-i şerîf-i enverde kendilerin üvey vâlideleri ve sagīrât-ı mezbûrâtın vâlideleri ve tesviye-i emirlerine vasiyy-i mansûbeleri olup zâtı ta‘rîf-i şer‘î ile mu‘arrefe olan mezbûre Fâtıma mahzarında her biri ikrâr ve takrîr-i kelâm edip babamız müteveffâ-i mezbûrun beynimizde ma‘lûme cemî‘ menkūl ve nukūd terekesinden ber-vech-i muharrer sekiz sehmden ikimize isâbet eden dört sehm hissemiz mukābelesinde şerâit-i sıhhat-i sulhü hâvî mevâni‘-i müfsideden ârî alâ-tarîkı’t-tehârüci’ş-şer‘î nukūd ve terekeden hissemizden ezyed on guruş üzerine sulh olup ve bedel-i sulh olan meblağ-ı mezbûru bi-kadri’l-hısas mezbûre Fâtıma yedinden tamamen ahz u kabz edip babamız müteveffâ-i mezbûrun mecmû‘-ı terekesine müte‘allika âmme-i da‘âvâdan her birimiz mezbûre Fâtıma’nın ve sagīrât-ı mezbûrâtın zimmetlerini ibrâ ve iskāt eyledik dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 23 min-Cumâdelâhire sene 1121 Şuhûdü’l-hâl: Es-sâbikūn, es-sâbikūn, es-sâbikūn