Üsküdar Mahkemesi 9 Numaralı Sicil (H. 940-942 / M. 1534-1536) cilt: 4, sayfa: 364 Hüküm no: 911 Orijinal metin no: [114a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Kara Memi’nin Ali b. Emir’e kefaletten borçlu olduğu Sebeb-i tahrîr-i sicil budur ki Ali b. Emir nefs-і Üsküdar’dan Hüseyin b. Hacı nâm eytâma kıbel-і şer‘den vasî olan Süleyman b. Abdi ile şer‘-i şerîf meclisine hâzırân olup mezkûr Ali bi’l-muvâcehe takrîr-i da‘vâ kılıp dedi ki bundan akdem mezkûr Hüseyin v. Hacı’nın karındaşı Kara Memi Galata’da beş bin akçe mukāta‘a ile Mustafa Paşa hazretlerinden iş alıp bu fakīr dahi zarar-ı mala kefîl olup zikr olan iş beş bin akçe ziyân edip zikr olan beş bin akçeyi fakīrden alıp hâliyâ mezkûr Kara Memi fevt olup metrûkâtı merhûm Hacı[’ya] intikāl edip hâliyâ Hacı dahi fevt olup metrûkât oğlu Hüseyin’e intikāl edip öyle olsa zikr olan beş bin akçeyi taleb ederim deyicek vasî-і mezbûr bi’l-mukābele bu ma‘nâyı inkâr eyledi gıbbe’l-inkâr müdde‘î-і mezbûrun da‘vâsına muvâfık beyyine taleb olundu. Udûl-і müslimînden ve sikāt-ı muvahhidînden Hoca Paşa mahallesinden Musa b. Yusuf ve Karagöz b. Abdullah seferde olup anın ağzından Cafer b. Hızır ve Beşir b. ( ) şehâdet için hâzırûn olup şöyle edâ-і şehâdet-і şer‘iyye kılıp dediler ki biz şâhidleriz ve şehâdet dahi ederiz ki mezkûr Kara Memi Galata’da mukāta‘aya beş bin akçelik iş alıp mezbûr Ali b. Emir dahi mezbûra kefîl bi’l-mâl olup hâliyâ mezkûr Ali’den iş ziyân ettikden sonra beş [bin] akçe alınıp Kara Memi fevt olup zimmetinde kaldı deyû şehâdet eylediklerinden şâhidûn-ı mezbûrûnun şehâdetleri ba‘de’t-tezkiyyeti’ş-şer‘î hayyiz-і kabûlde vâkī‘ oldukdan sonra mezkûr Kara Memi’nin metrûkâtından hükm olup sicil olundu. Tahrîren fî 22 Cemâziyelâhir sene isnâ ve erba‘în ve tis‘a mi’e. Şuhûdü’l-hâl: Mevlânâ Ramazan b. Ahmed, Mevlânâ Muhyiddin [b.] Mustafa, Hasan Bey b. Abdi ve kâtibü’l-hurûf ve gayruhüm.