Üsküdar Mahkemesi 9 Numaralı Sicil (H. 940-942 / M. 1534-1536) cilt: 4, sayfa: 378 Hüküm no: 940 Orijinal metin no: [119b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Paşa Vakfı’nın cihâtının Mehmed Paşa oğlu Hüsrev’in izni olmadan kimseye verilmemesi konusunda ferman sureti Sûret-і hükm-і cihân-mutâ‘ nukilet bilâ-ziyâde Kıdvetü’l-kuzât ve’l-hükkâm ma‘denü’l-fazl ve’l-kelâm Mevlânâ Gekvize Kadısı -dâme fazluhu- tevkī‘-i refî‘-і hümâyûn vâsıl olıcak ma‘lûm ola ki Mehmed Paşa oğlu dârende-і fermân-ı vâcibü’l-iz‘ân hâlefü’l-ümerâ ve’l-ekârim müstecmi‘-і cemî‘ü’l-mecâmil ve’l-mekârim Hüsrev -dâme mecduhu- dergâh-ı sa‘âdet-destgâhıma şöyle arz eyledi ki babası Mehmed Paşa’nın nefs-і Üsküdar’da vâkī‘ olan câmi‘inin ve evkāfının cihâtı kendinin izni ve ma‘rifeti olmadan evlâd-ı utekādan mahal ve müstahak kimesne var iken anlara verilmeyip hâne-і avârızdan ba‘zı kimesnelere tevcîh olunup zikr olan evkāfının cihâtı min ba‘d kendinin izni ve ma‘rifeti olmadan kimesneye tevcîh olunmayıp evlâd-ı utekādan olan mahal ve müstahak kimesnelere tevcîh olunmak bâbında hükm-і şerîf-і cihân-mutâ‘ taleb etmeğin buyurdum ki hükm-і şerîf-і vâcibü’l-ittibâ‘ım vardıkda göresiz müşârün-ileyhin kendinin izni ve ma‘rifeti olmadan evkāf-ı mezbûrenin cihâtından hâne-і avârız olanlara ne mikdâr cihet tevcîh olunmuş ise anın gibi hâne-і avârızdan cihât tasarruf edenlerin cihetlerini alıp evlâd-ı utekādan mahal ve müstahak kimesnelere mûmâ-ileyhin izni ve ma‘rifeti ile tevcîh edesiz ve’l-hâsıl evkāf-ı mezbûrenin cüz’î ve küllî vâkī‘ olan cihâtı mûmâ-ileyhin izni ve ma‘rifet-і mütevellî olmadan bir ferde tevcîh etmeyip ol bâbda vechen mine’l-vücûh kimesneye nizâ‘ ettirmeyip zikr olan cihâtı müşârün-ileyh her kime ta‘yîn ederse ana tevcîh edesiz tasarruf ettiresiz hilâf-ı emr-і şerîf tevcîh olunur ise dahi amel etmeyesiz min ba‘d fermân-ı hümâyûnum üzre amel edip bir dahi mûmâ-ileyh tarafından zikr olan evkāfın cihâtı benim ma‘rifetim olmadan âhara tevcîh olundu deyû şikâyet etmekten ziyâde hazer edesiz şöyle bilesiz ba‘de’n-nazar bu hükm-і hümâyûnumu müşârün-ileyh elinde ibkā edesiz alâmet-і şerîfe i‘timâd kılasız. Tahrîren fî evâsıtı şehrі Şa‘bâni’l-mu‘azzam sene 940. Be medîne-і Haleb.