Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 397 Hüküm no: 437 Orijinal metin no: [60a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mûytâb Hristo v. Yuvan’ın ortaklıkları biten Aleksan v. Nikola’daki alacağını sulh yoluyla teslim aldığı Mûytâb tâifesinden Hristo v. Yuvan nâm zimmî mahfil-i kazâda işbu bâ‘isü’s-sifr Aleksan v. Nikola nâm zimmî muvâcehesinde ikrâr ve takrîr-i kelâm edip bundan akdem mezbûr Aleksan ile mûytâblık san‘atında on bir ay şerîkler olup hâlâ fesh-i akd-i şirket eylediğimizde mezbûr Aleksan zimmetinde on bin akçe hakkım vardır deyü mezbûr Aleksan’dan taleb ve da‘vâ eylediğimde ol dahi inkâr etmekle beynimizde nizâ‘-ı küllî vâki‘ olmuş idi el-hâletü hâzihî beynimize muslihûn tavassut edip da‘vâ-yı mezkûremden beni an-inkârin merkūm Aleksan ile beş bin akçe üzerine sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr beş bin akçeyi merkūm Aleksan yedinden ahz u kabz eylediğimden sonra husûs-ı mezkûra ve târih-i kitâba gelince beynimizde cereyân eden ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika âmme-i de‘âvî ve mutâlebâtdan mezbûr Aleksan’ın zimmetini ibrâ-i âmm-ı kātı‘u’n-nizâ‘la ibrâ ve iskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-gurreti Recebi’l-ferd sene 1121 Şuhûdü’l-hâl: Mehmed b. Ahmed, Mustafa b. Şa‘ban, Ali b. İvaz, Abdullah b. Abdullah, Ali b. Bâli, Süleyman b. Abdullah ve gayruhum mine’l-huzzâr. Logori v. Mihal, Metro v. Milo, Yamandi v. Dimitri, Yanaki v. Filo, Tobani v. Miho.