Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 396 Hüküm no: 436 Orijinal metin no: [60a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ehliiman bt. Hasan’ın Edremid’in Babailer? köyündeki zeytin ağaçlarını Ahmed Beşe b. Ali’ye sattığı Vilâyet-i Anadolu’da Edremid kasabası ahâlîsinden olup mahmiye-i İstanbul’da Müftî Ali Çelebi Mahallesiʼnde sâkine zâtı Halil Efendi b. el-Hâc Mehmed ve el-Hâc Pîrî b. Halil nâm kimesneler ta‘rîfleriyle mu‘arrefe olan Ehliiman bt. Hasan nâm hatun mahfil-i kazâda işbu râfi‘u’l-kitâb Ahmed Beşe b. Ali nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup kasaba-i mezbûreye tâbi‘ Babaipler? nâm karye kurbünde Akçeşme nâm mevzi‘de vâki‘ bir tarafdan el-Hâc Abdülfettâh nâm kimesne zeytin bahçesi ve bir tarafdan Receb Çelebi oğlu zeytin bahçesi ve bir tarafdan el-Hâc Arslan oğlu zeytin bahçesi ve bir tarafdan el-Hâc İvaz zeytin bahçesi ile mahdûd mülk zeytin eşcârımı tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile mezbûr Ahmed Beşe’ye altmış üç guruşa bey‘ ve temlîk eylediğimde ol dahi ber-vech-i muharrer iştirâ ve temellük ve tesellüm eylediğinden sonra semeni olan meblağ-ı mezbûr altmış üç guruşu mezbûr Ahmed Beşe yedinden tamamen ahz u kabz eyledim baʻde’l-yevm bahçe-i mahdûde-i mezkûre merkūm Ahmed Beşe’nin mülk-i müşterâsı ve hakk-ı sırfı olup mahallinde zabt u tasarrufa mezbûr Ahmed Beşe’yi taslît eyledim keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 4 min-Recebi’l-ferd sene 1121 Şuhûdü’l-hâl: Molla Mustafa Bostanî, Molla Mehmed b. Mustafa, Halil b. el-Hâc Pîrî, Halil Çelebi b. el-Hâc Mehmed, el-Hâc Pîrî b. Halil ve gayruhum mine’l-huzzâr.