Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 398 Hüküm no: 439 Orijinal metin no: [60b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sâliha bt. Hasan’ın Edirne’nin Çirkef Mahallesiʼndeki evini Seyyid Mehmed Çelebi b. Ali’ye sattığı Mahmiye-i İstanbul’da Keçeci Pîrî Mahallesiʼnde sâkine Sâliha bt. Hasan nâm hatun tarafından husûs-ı âti’l-beyâna vekîl olduğu zât-ı mezbûreyi ma‘rifet-i şer‘iyye ile ârifân es-Seyyid İsmail Efendi b. eş-Şeyh Mehmed Dede Efendi ve el-Hâc Mustafa b. Ömer nâm kimesneler şehâdetleriyle şer‘an sâbit olan Hasan Efendi b. Ali nâm kimesne meclis-i şer‘-i şerîf-i enverde işbu râfi‘u’l-kitâb es-Seyyid Mehmed Çelebi b. Ali nâm kimesne mahzarında bi’l-vekâle ikrâr ve takrîr-i kelâm edip müvekkilem mezbûrenin silk-i mülkünde münselik olup mahrûse-i Edirne’de Çirkef Mahallesiʼnde vâki‘ bir tarafdan Kılcı Mehmed menzili ve bir tarafdan Sâkine Hatun menzili ve bir tarafdan Mülayim Usta menzili ve bir tarafdan tarîk-i âm ile mahdûd tahtânî bir bâb oda ve bir sofa ve bir bi’r-i mâ ve kenîf ve bir mikdâr havluyu müştemil mülk menzilini bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr es-Seyyid Mehmed Çelebi’ye yüz guruşa bey‘ ve temlîk ol dahi ber-vech-i muharrer iştirâ ve temellük ve kabûl eylediğinden sonra semeni olan meblağ-ı mezbûr yüz guruşdan mezkûr es-Seyyid Mehmed Çelebi’nin zimmetini ibrâ-i âmm-ı kātı‘u’n-nizâ‘la ibrâ ve iskāt edip menzil-i mahdûd-ı mezkûru mahallinde kabz ve tasarrufa mezkûr es-Seyyid Mehmed Çelebi’yi taslît eyledi keyfe mâ yeşâ ve yehtâr mutasarrıf olsun dedi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-gurreti Recebi’l-mürecceb sene 1121 Şuhûdü’l-hâl: Es-Seyyid Abdullah Çelebi b. eş-Şeyh Mehmed Dede Efendi, İbrahim Ağa b. el-Hâc Mehmed, Müezzin İbrahim Çelebi b. el-Hâc Mustafa, Ahmed Efendi b. Osman Bey, Mustafa b. Şa‘ban ve gayruhum mine’l-huzzâr.