Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 398 Hüküm no: 440 Orijinal metin no: [60b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saime bt. Abdullah’ın talebiyle boşandığı kocası İbrahim Beşe b. İbrahim’in ödemesi şartıyla küçük çocukları Mehmed’in ihtiyaçları için nafaka takdir edildiği Mahmiye-i İstanbul’da Gül Câmi‘-i şerîfi Mahallesiʼnde sâkine olup zâtı <> ta‘rîf-i şer‘î ile mu‘arrefe olan işbu râfi‘atü’l-kitâb Saime bt. Abdullah nâm hatun meclis-i şer‘-i şerîf-i enverde zevc-i mutallıkı İbrahim Beşe b. İbrahim nâm kimesne mahzarında takrîr-i kelâm ve tâʻbir ani’l-merâm edip zevcim mezbûr İbrahim’in firâşından hâsıl ve benden mütevellid bi-hakkı’l-hıdâne hâlâ hacr u terbiyemde olan işbu sadrî sagīr oğlum Mehmed’in nafaka ve kisveye ihtiyâcı olmağla babası mezbûr İbrahim Beşe üzerine kıbel-i şer‘den kadr-i ma‘rûf nafaka ve kisve-bahâ farz ve takdîr olunmak matlûbumdur dedikde gıbbe’t-tasdîk hâkim-i muvakki‘-ı sadr-ı kitâb tûbâ-lehû ve hüsnü-meâb hazretleri dahi sagīr-i mezbûr Mehmed’in nafaka ve kisve-bahâsıʼçün babası mezbûr İbrahim Beşe üzerine târih-i kitâbdan beher yevm bi’t-terâzî dört akçe nafaka farz ve takdîr edip meblağ-ı mefrûz-ı mezbûru sagīr-i mezbûrun nafaka ve kisve ve sâir levâzım-ı zarûriyyesine harc u sarfa ve lede’l-iktizâ istidâneye ve inde’z-zafer babası mezbûr İbrahim Beşe üzerine rücû‘a mezbûre Saime’ye izin vermeğin mâ-vaka‘a bi’t-taleb ketb olundu. Fî 3 min-Recebi’l-mürecceb sene 1121 Şuhûdü’l-hâl: Mustafa Çelebi b. Şa‘ban, Ahmed Efendi b. Osman, Abdülkerim b. Ahmed, Ali b. İvaz ve gayruhum mine’l-huzzâr.