Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 404 Hüküm no: 449 Orijinal metin no: [61b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Beşe b. Ca‘fer ile kardeşi Receb’in odun ve buğday bedelinden alacakları olduğu Karabet v. Begos ve Hazer v. Avanos’un borçlarını ödemesi Mahmiye-i İstanbul’da Tûtî Latif Mahallesi sükkânından Ali Beşe ve Receb Beşe ibney Ca‘fer nâm karındaşlar meclis-i şer‘-i şerîf-i enver ve mahfil-i dîn-i münîf-i ezherde Karabet v. Begos ve Hazer v. Avanos nâm zimmîler muvâcehelerinde üzerlerine da‘vâ ve takrîr-i kelâm edip mezkûrân Karabet ve Hazer zimmetlerinde çekisi beynimizde ma‘lûm odun bahâsından kırk guruş ve çeki ve kıymeti beynimizde ma‘lûm buğday bahâsından elli guruş cem‘an ciheteyn-i mezkûreteynden doksan guruş hakkımız olup meblağ-ı mezkûr doksan guruşa her biri âharın zimmetine lâzım gelen meblağa kefîl olmağla hâlâ suâl olunup meblağ-ı mezbûru bize teslîme tenbîh olunmak matlûbumuzdur dediklerinde gıbbe’s-suâl mezkûrân Karabet ve Hazer’den her biri cevâblarında kaziyye minvâl-i meşrûh üzere olup müdde‘iyân-ı mezkûrâna ber-vech-i muharrer doksan guruş deynleri olup her biri âharın zimmetine lâzım gelen meblağa kefîl olduklarını her biri tâyi‘an ikrâr u i‘tirâf etmeleriyle alâ-mûcebi i‘tirâfihimâ meblağ-ı mezbûru müdde‘iyân-ı mezkûrâna edâ ve teslîme mezkûrân Karabet ve Hazer’den her birine tenbîh-birle mâ-vaka‘a bi’t-taleb ketb olundu. Fî 6 min-Recebi’l-ferd sene 1121 Şuhûdü’l-hâl: Ali Çelebi b. Mehmed, Abdullah b. Abdurrahman, Mehmed Çelebi b. Abdurrahman, Mehmed Çelebi b. Ahmed, Bekir Beşe b. Osman ve gayruhum mine’l-huzzâr.