Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 403 Hüküm no: 448 Orijinal metin no: [61b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Raziye bt. Mehmed’in Molla Mustafa b. Ahmed’den satın aldığı evin satışın iptaliyle parasını geri alıp birbirlerinin zimmetlerini ibra ettikleri Mahmiye-i İstanbul’da Mismârî Şücâ‘ Mahallesi sâkinelerinden Raziye bt. Mehmed nâm hatun ba‘de’t-ta‘rîfi’ş-şer‘î meclis-i şer‘-i şerîf-i enverde işbu râfi‘u’l-vesîka Monla Mustafa b. Ahmed nâm kimesne muvâcehesinde bi-tav‘ihâ ikrâr ve takrîr-i kelâm edip mezkûr Monla Mustafa bundan akdem mahalle-i mezkûrede vâki‘ bir tarafdan Basmacı Osman mülkü ve bir tarafdan el-Hâc Mustafa Çavuş mülkü ve bir tarafdan mezkûr Monla Mustafa’nın âhar mülkü ve bir tarafdan tarîk-i âm ile mahdûd tûlen ve arzen bi-hesâb-ı terbî‘î yüz yetmiş üç zirâ‘ arsa üzerinde mebnî bir bâb fevkānî oda ve bir sofa ve bir bâb tahtânî oda ve bir kenîfi muhtevî mülk menzilinin nısf-ı şâyi‘ini yüz guruşa bana bey‘ ve temlîk ve teslîm ben dahi iştirâ ve temellük ve tesellüm etmişidim el-hâletü hâzihî bey‘-i mezkûru fesh ve ikāle edip mezkûr Monla Mustafa meblağ-ı mezkûr yüz guruşu bana def‘ ü teslîm ben dahi yedinden ahz u kabz edip menzil-i mezkûrda olan nısf hisse yine mezkûr Molla Mustafa’ya redd ü teslîm eyledim baʻde’l-yevm husûs-ı mezkûra müte‘allika birbirimiz ile da‘vâ ve nizâ‘ımız kalmadı dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 7 min-Recebi’l-ferd sene 1121 Şuhûdü’l-hâl: Ömer Efendi b. Şükrullah, Hüseyin Efendi b. Mahmud, Halil Efendi b. Yusuf el-Müezzin, Molla Hüseyin b. Mustafa, el-Hâc Ali b. Abdullah, el-Hâc Mustafa b. Abdurrahman, el-Hâc Süleyman b. Abdurrahim, Hüseyin Efendi b. Mustafa, Mustafa b. Gazanfer ve gayruhum mine’l-huzzâr.