Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 406 Hüküm no: 453 Orijinal metin no: [62a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Taşçı Hüseyin Beşe b. Ali’nin evini Saime Hatun Vakfı’na istiğlal yoluyla sattığı Mahmiye-i İstanbul’da Veled-i Karabaş Mahallesiʼnde sâkin Taşçı Hüseyin Beşe b. Ali nâm kimesne merhûme Saime Hatun Vakfı’na bi’l-fi‘il mütevellî olan fahrü’l-müderrisîni’l-kirâm işbu bâ‘isü’l-kitâb İsmail Efendi b. Derviş Efendi mahzarında ikrâr ve takrîr-i kelâm edip mahalle-i mezbûrede vâki‘ bir tarafdan Âişe bt. Osman nâm hatun mülkü ve bir tarafdan Ahmed Beşe mülkü ve iki tarafdan tarîk-i âm ile mahdûd büyût-ı adîdeyi müştemil mülk menzilimi mütevellî-i mezbûr İsmail Efendi’ye bi-tarîkı’l-istiğlâl elli guruşa bey‘ ve teslîm eylediğimde ol dahi yedinde olan mâl-ı vakf-ı mezbûr ile iştirâ ve tesellüm ve kabûl eylediğinden sonra semeni olan meblağ-ı mezbûr elli guruşu mütevellî-i mezbûr yedinden tamamen ahz u kabz eylediğimden sonra mütevellî-i mezbûr menzil-i mahdûd-ı mezkûru gıbbe’t-tahliyyeti’ş-şer‘iyye ve’t-tekābuzi’l-mer‘î târih-i kitâb senesi şehri Rebî‘ülevvel’i gurresinden bir sene tamamına değin yine bana yedi buçuk guruşa îcâr ve teslîm ben dahi istîcâr ve tesellüm eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 9 min-Recebi’l-ferd sene 1121 Şuhûdü’l-hâl: Es-Seyyid Tahir Efendi Hoca-i Saray-ı Atîk-i sultânî, Za‘îm Mehmed Ağa b. Tabî‘î, İbrahim Çelebi b. Mustafa, İbrahim Çelebi b. Abdurrahman, Fahrü’l-kuzât Ali Efendi el-Kādı bi Amasya sâbıkā, Osman Efendi b. Ali Efendi, Mustafa b. Şa‘ban, Ali b. Bâli ve gayruhum mine’l-huzzâr.