Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 407 Hüküm no: 454 Orijinal metin no: [62a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Halîfe b. Abdülmennan’ın Akşemseddin mahallesindeki evini Mehmed Halîfe b. Ahmed’e sattığı Mahmiye-i İstanbul’da Akşemseddin Mahallesi sükkânından Ali Halîfe b. Abdülmennan tarafından husûs-ı âti’l-beyâna vekîl olduğu Mustafa Beşe b. Hasan ve Ali Çelebi b. Ahmed şehâdetleriyle şer‘an sâbit olan Hamza Efendi b. Mehmed meclis-i şer‘-i şerîf-i enverde işbu râfi‘u’l-vesîka Mehmed Halîfe b. Ahmed muvâcehesinde bi’l-vekâle ikrâr ve takrîr-i kelâm edip arsası sulehâdan bir racüle meşrûta el-Hâc Mehmed b. Osman nâm sâhibü’l-hayrın vakfı ve ebniye-i âtiyesi akd-i câʻî sudûruna değin müvekkilem mezkûr Ali Halîfe’nin yedinde mülk ve hakkı olup mahalle-i mezkûrede vâki‘ bir tarafdan Hüseyin Ağa menzili ve bir tarafdan Havvâ Hatun menzili ve bir tarafdan Mehmed Çelebi veresesi menzilleri ve bir tarafdan tarîk-i âm ile mahdûd ve ebniye-i memlûkemi tarafeynden îcâb ve kabûlü hâvî bey‘-i bâtt-ı sahîh-i şer‘î ile mezkûr Mehmed Halîfe’ye yüz otuz guruşa bey‘ ve temlîk ve teslîm ol dahi ber-vech-i meşrûh iştirâ ve temellük ve tesellüm ve kabûl eylediğinden sonra semeni olan meblağ-ı mezkûr yüz otuz guruşu mezkûr Mehmed Halîfe yedinden müvekkilim mezkûr bi’t-tamam ve’l-kemâl ahz u kabz eyleyip arsa-yı mezkûresinden meccânen kasr-ı yed eyledi baʻde’l-yevm menzil-i mahdûd-ı mezkûr mezbûr Mehmed Halîfe’nin ber-vech-i meşrûh mülk-i müşterâsı olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 8 min-Recebi’l-ferd sene 1121 Şuhûdü’l-hâl: Yusuf Efendi b. Abdullah, Receb Çelebi b. Ali, Mustafa Çelebi b. Abdullah, Osman Çavuş, Mustafa Beşe b. Hasan, Yusuf b. Abdullah, el-Hâc Yusuf b. Abdullah, el-Hâc Ahmed b. Abdurrahman, Mustafa Çelebi b. Şa‘ban, Ömer Çelebi b. Kenan, Hüseyin Çelebi b. Hasan, Osman Çelebi b. Hasan ve gayruhum mine’l-huzzâr.