Üsküdar Mahkemesi 14 Numaralı Sicil (H.953-955/ M. 1546-1549) cilt: 5, sayfa: 168 Hüküm no: 286 Orijinal metin no: [42a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed b. Bahşî’nin çalınan atını Ali b. İskender’de bulması Vech-i tahrîr-i sicil budur ki Karye-i Samandıra’dan Ahmed b. Bahşî şerî‘at mahfilinde kazâ-yı Akyazı’da Vakıf nâm karyeden Ali b. İskender nâm kimesne muvâcehesinde takrîr-i da‘vâ kılıp eyitdi ki evim yanında bir alnı sakar al atım sirkat olunup hâliyâ senden taleb ederim dedikde mezbûr Ali cevâb vericek, bana Samandıra’dan Hasan b. Kaya nâm kimesne verdi köklemek için dedikde mezbûr Hasan inkâr ettikde mezbûr Ali’den beyyine taleb olunup âciz oldukda mezbûr Hasan’dan yemîn teklîf olunup şer‘an yemîn verildikden sonra ve mezbûr Ahmed’den beyyine taleb olunup Ali Fakīh b. Üveys el-Müezzin ve Ali b. Abdullah nâm kimesneler, biz şâhidleriz ve şehâdet ederiz zikr olunan at, işbu Ahmed’indir deyû şehâdet-i şer‘iyye edâ edip ba‘de’t-tezkiyye hayyiz-i kabûlde vâki‘ olup bi’t-taleb sicil olundu. Vaka‘a’t-tahrîr fî evâili Rebî‘ilevvel sene 954. Şuhûdü’l-hâl: Muhyiddin Halîfe b. Dâvud el-Hatîb, Sinan b. Abdullah, Hüseyin b. İsa, Sefer b. İsa, Musa b. İsa, Murad b. Mehmed, Veli b. Râcil, Şaban b. Yusuf ve gayruhüm.