Üsküdar Mahkemesi 14 Numaralı Sicil (H.953-955/ M. 1546-1549) cilt: 5, sayfa: 175 Hüküm no: 308 Orijinal metin no: [45b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Maltepe mukâtaasının Dimitri b. Buber’e devredildiği Vech-i tahrîr-i sicil budur ki Merhûm ve mağfûrun-leh Hoca Fazlullah zâviyesine hâliyâ berât-ı hümâyûn ile mütevellî olan Şah Çelebi b. Seydî Çelebi meclis-i şer‘a hâzır olup karye-i mezbûrdan Dimitri b. Buber muvâcehesinde takrîr-i kelâm kılıp eyitdi ki karye-i mezbûru Nikola b. Kefale’ye üç seneyi seksen iki bin üç yüz akçeye mukāta‘aya verilmiş idi. Hâliyâ bir senesin geçip sene selâse ve hamsîne ve tis‘a mi’e Zilka‘desi gurresinden iki seneyi iki yüz akçe ziyâde edip elli beş bin yedi yüz altmış altı akçeye mukāta‘aya verdim dedikde ve mezbûr Dimitri dahi gurre-i mezbûrdan iki seneyi elli beş bin yedi yüz altmış altı akçeye hâssa yerler tapusundan gayrı cüz’î ve küllî vakfa âid olan hâsıl ve her üç ayda bir yevmü’l-kıst vermek üzre kabûl ve iltizâm ettim deyip ve zarar-ı malına Kosta b. Markova kefîl bi’l-mâl olup mütevellî talebi ile sicil olundu. Vaka‘a’t-tahrîr fî evâili Cemâziyelevvel sene 954. Şuhûdü’l-hâl: Pîr Ahmed Çelebi b. Vasi Kadı?, Ömer b. Üveys, Nebi b. Abdi Fakīh, Ahmed b. Hasan Hoca ve câbi Ahmed b. Hızır, Ramazan b. Hüseyin ve gayruhüm.