Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 414 Hüküm no: 466 Orijinal metin no: [63b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer Ağa b. Ebûbekir’in kendisini yaralayan İsmail b. Ahmed’le sulh olup birbirlerinin zimmetlerini ibra ettikleri Mahmiye-i İstanbul’da Davudpaşa Mahallesi sükkânından Ömer Ağa b. Ebûbekir nâm kimesne meclis-i şer‘de işbu bâ‘isü’l-kitâb İsmail b. Ahmed nâm kimesne mahzarında ikrâr-ı tâm ve takrîr-i kelâm edip bundan akdem mezbûr İsmail bi-gayr-ı hakkın benim sol kaşım üzerine darb ve cerh edip mûceb-i şer‘îsini mezbûr İsmail’den taleb ve da‘vâ eylediğimde beynimizde münâza‘ât-ı kesîre ve muhâsamât-ı şedîde vâkı‘a olmuş idi el-hâletü hâzihî beynimize muslihûn tavassut edip da‘vâ-yı mezkûremden beni mezbûr İsmail ile on guruş üzerine sulh eylediklerinde ben dahi minvâl-i muharrer üzere sulh-ı mezbûru kabûl ve bedel-i sulh olan meblağ-ı mezbûr on guruşu mezbûr İsmail yedinden tamamen ahz u kabz edip cerh-i mezkûre ve mâ-tehaddese minhe müte‘allika âmme-i de‘âvî ve mutâlebâtdan ben mezbûr İsmail’in zimmetini ibrâ-i âmm-ı kātı‘u’n-nizâ‘la ibrâ ve iskāt eyledim ve mezbûr İsmail dahi bedel-i sulh nâmıyla bana medfû‘u olan meblağ-ı mezbûr on guruş da‘vâsından benim zimmetimi ibrâ-i âmm-ı kātı‘u’n-nizâ‘la ibrâ ve iskāt eyledi fîmâ-ba‘d birbirimiz ile kat‘â da‘vâ ve nizâ‘ımız kalmadı dedikde gıbbe’t-tasdîkı’ş-şer‘î Mahmiye-i mezbûrede Darbhâne kurbünde Yolgeçen odalarında sâkin el-Hâc Mustafa b. Ömer nâm kimesne meclis-i mezkûrda merkūm Ömer Ağa muvâcehesinde ikrâr ve takrîr-i kelâm edip fîmâ-ba‘d mezbûr İsmail’den merkūm Ömer Ağa’ya zarâr terettüb eder ise merkūm İsmail’in nefsine ve hîn-i mutâlebede meclis-i şer‘-i şerîfe ihzârına ben kefîl oldum dedikde mezbûr Hacı Mustafa’nın dahi kezâlik nefsine Ömer Çavuş b. Ahmed kefîl olmağın mâ-vaka‘a bi’t-taleb ketb olundu. Fî 10 min-Recebi’l-ferd sene 1121 Şuhûdü’l-hâl: el-Hâc İbrahim b. Abdurrahman, Mustafa Çelebi b. Şa‘ban, Hasan Çelebi b. Hüseyin, Kazzâz Halil Çelebi b. Abdullah, Attâr Mustafa Çelebi b. Ali, Ömer b. Ahmed, Mustafa b. İbrahim, Ömer Ağa b. Ahmed, Ali Çelebi b. İvaz, Ali Beşe b. Bâli ve gayruhum mine’l-huzzâr.