Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 415 Hüküm no: 467 Orijinal metin no: [63b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Lulude bt. Kostantin’in Lefter v. Velican’a daha önce satmış olduğu arsanın parasını alıp zimmetini ibra ettiğini tescil ettirdiği Vilâyet-i Rumeli’nde Ahyolu kazâsına tâbi‘ Ahtabolu nâm karye ahâlîsinden olup mahrûse-i Galata’ya tâbi‘ kasaba-i Yeniköy’de sâkine zâtı ta‘rîf-i şer‘î ile mu‘arrefe olan Lulude bt. Kostantin nâm Nasrâniye mahfil-i kazâda işbu râfi‘u’s-sifr Lefter v. Velican nâm zimmî muvâcehesinde ikrâr ve takrîr-i kelâm edip karye-i mezbûrede vâki‘ bir tarafdan Kostantin mülkü ve bir tarafdan Küçük Yani mülkü ve bir tarafdan Kiryakor Fakīr demekle ma‘rûf zimmî mülkü ve bir tarafdan tarîk-i âm ile mahdûd bir fırını müştemil mülk menzil arsasını bundan akdem mezbûr Lefter zimmîye otuz üç guruşa bey‘ ve mahallinde teslîm ve kabz-ı semen etmişidim hâlâ arsa-yı mahdûde-i mezkûre cemî‘ müştemilâtıyla mezbûr Lefter’in mülk-i müşterâsı olmuşdur benim kat‘â alâka ve medhalim olmayıp husûs-ı mezbûra müte‘allika âmme-i da‘vâdan mezbûr Lefter’in zimmetini ibrâ ve iskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 11 min-Recebi’l-ferd sene 1121 Şuhûdü’l-hâl: Mustafa b. Şa‘ban, Ali b. İvaz, Hasan b. Mustafa, Ali b. Bâli, Süleyman b. Abdullah ve gayruhum mine’l-huzzâr.