Üsküdar Mahkemesi 14 Numaralı Sicil (H.953-955/ M. 1546-1549) cilt: 5, sayfa: 197 Hüküm no: 377 Orijinal metin no: [54a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şoni bt. Şileli’nin ölen Kosta b. Riçine’ye olan borcunu hazineye ödemesi Vech-i tahrîr-i sicil budur ki Hızır b. Ahmed zevâbıt-ı beytülmâl olup şerî‘at mahfilinde karye-i Çengel’den Şoni bt. Şileli nâm zimmîye muvâcehesinde takrîr-i kelâm kılıp eyitdi ki Kosta b. Riçine nâm levend hâl-i hayâtında üç yüz otuz akçe ve bir kebe ve üç çuval verdi fevt olup sende kaldı dedikde mezbûre Şoni inkâr edip gıbbe’l-inkâr beyyine taleb olunup Kiryaki b. Yorgi ve Yorgi b. Nikola nâm zimmîler biz şâhidleriz ve şehâdet ederiz üç yüz otuz akçe ve bir kebe ve üç çuval verdi fevt olup kaldı deyû şehâdet-i şer‘iyye edâ ettiklerinde ba‘de’t-tezkiyye hayyiz-i kabûlde vâki‘ olup bi’t-taleb sicil olundu. Vaka‘a’t-tahrîr fî evâhiri Recebi’l-mürecceb sene 954. Şuhûdü’l-hâl: Şah [Çelebi] b. [Seydî] Çelebi, Mahmud b. Turgud, Mustafa b. Mehmed, Mustafa Bey b. [Abdullah], Kara Yusuf b. Abdullah ve gayruhüm.