Üsküdar Mahkemesi 14 Numaralı Sicil (H.953-955/ M. 1546-1549) cilt: 5, sayfa: 205 Hüküm no: 399 Orijinal metin no: [57a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Todora b. Kalod ve Mihal b. Kalod’un arazi anlaşmazlığı Vech-i tahrîr-i sicil budur ki Todora b. Kalod ve Mihal b. Kalod meclis-i şer‘a hâzırân olduklarında mezbûr Todora takrîr-i da‘vâ edip eyitdi ki, senin tasarruf ettiğin yer ki hudûd bir cânibi Papaz tarlasına ve iki cânibi Kûhî dağa [ve] benim tarlama muttasıldır benim kazma ile oğlum Mahmud b. Abdullah ile açıp ve iki kıt‘a kuyu dahi açıp bostan edip mutasarrıf olduk deyip mezbûr Mihal’den suâl olunup çiftlik yerdir mu‘attal kalıp sipâhiden tapuya alıp tasarruf ede deyû cevâb verip açmaları idiğine inkâr edip gıbbe’l-inkâr mezbûrân Mahmud ile Todora’dan beyyine taleb olunup Hasan b. Abdullah ve Manol b. Doğan ve Nikola b. Yorgi nâm kimesneler biz şehâdet ederiz mezkûrân Mahmud ile Todora nâm kimesnelerin açmalarıdır deyû şehâdet ettiklerinde ba‘de’t-ta‘dîl şehâdetleri hayyiz-i kabûlde vâki‘ olup zikr olunan yer kazmaları ile açmaları olduğuna hükm olunup bi’t-taleb sicil olundu. [Vaka‘a’t-tahrîr] fî evâili Şa‘bân sene 954. Şuhûdü’l-hâl: Fi’l-a‘lâ.