Üsküdar Mahkemesi 14 Numaralı Sicil (H.953-955/ M. 1546-1549) cilt: 5, sayfa: 232 Hüküm no: 484 Orijinal metin no: [67a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hızır b. Şahbaldin’in eşyalarını ödünç karşılığında Seyyid İbrahim b. Seyyid Mahmud’a rehin bıraktığı Vech-i tahrîr-i sicil budur ki Mahrûse-i İstanbul’dan mahalle-i Balabanağa’da Sekbânlar bölüğünde Zağarcı bölüğünden Hızır b. Şahbaldin şerî‘at mahfilinde ikrâr ve i‘tirâf edip eyitdi ki, işbu müşârün-ileyh Seyyid İbrahim b. Seyyid Mahmud’dan yüz elli aded tamâmü’l-vezn sultânî altın karz-ı hasen aldım ve ben dahi mezbûr Seyyid İbrahim’e vâlidem Zühre bt. Abdullah ile dört zirâ‘ mor ıskarlat çuka ve dört zirâ‘ kırmızı ıskarlat çuka ve üç kıt‘a ikiz? Kemhâ ve üç kıt‘a yeşil ve kırmızı sincaflık ve bir kaftanlık nohûdî atlas ve bir altın yüzük kaplama kaşlı esbâbı rehin gönderdim, teslîm olundu deyicek ve mezbûr Seyyid İbrahim dahi bi’l-muvâcehe ve’l-müşâfehe mezbûr Hızır yedine karz-ı hasen yüz elli aded tamâmü’l-vezn altını teslîm ettim ve mezbûre Zühre yedinden zikr olunan esbâbları merkūm altın için rehin aldım deyû ikrâr, vicâhen ve şifâhen tasdîk edip ve tarafeynden sâdır olan ikrârları bi hasebi’ş-şer‘i’ş-şerîf şer‘an mu‘teber görülüp mukarrer olup hükm olundu ve zararına Bayezid b. İlyas nâm ebnâ-i silâhî kefîl bi’l-mâl oldukdan sonra talebiyle bu vesîka-i şâriha ketb olunup, mûmâ-ileyh yedine vaz‘ olundu. Vaka‘a’t-tahrîr fî evâhiri Saferi’l-muzaffer sene 955. Şuhûdü’l-hâl: Mevlânâ Alâaddin Halîfe b. Abdurrahman el-İmâm ve Mevlânâ Osman Halîfe b. Durali el-İmâm an mahalleti Kilise Câmi‘i, Ahmed b. Ali ebnâ-i Silâhî, Haydar b. Yusuf ebnâ-i Silâhî, Hasan b. Abdullah er-Râcil, Mehmed b. Yusuf, Ali b. Yusuf, Sinan b. Abdullah, Ali b. Abdullah el-İmâm der-mahalleti Suhte Sinan, Veli b. Ahmed der-mahalleti Suhte Sinan, Yahya Çelebi b. Mehmed der Galata, Şaban b. Hüsam el-İmâm mahalle-i Toptaş, Veli b. Hamza, Hızır b. Abdullah, Sinan b. Mehmed, Mustafa b. Mehmed, Ramazan b. Hüseyin, Hasan b. Abdullah, Hızır b. Ahmed ve gayruhüm.