Üsküdar Mahkemesi 14 Numaralı Sicil (H.953-955/ M. 1546-1549) cilt: 5, sayfa: 236 Hüküm no: 495 Orijinal metin no: [68b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali b. Emir ile Nikola b. Yani arasındaki borç anlaşmazlığında sulh olması Vech-i tezkire oldur ki el-Hâc Ali b. Eymir asâleten ve karındaşları Bâli ve Veli ve Mustafa câniblerinden vekâleten ve karye-i Çengel’den Nikola b. Yani meclis-i şer‘a hâzırân olduklarında mezbûr Ali bi’l-muvâcehe takrîr-i da‘vâ kılıp eyitdi ki babam Emir b. Mustafa’dan on bin akçe karz aldın ve üç bin akçe benden aldın hâliyâ taleb ederim dedikde mezbûr Nikola’dan istintâk olundukda inkâr ile cevâb vericek bir akçe ve bir habbe senden ve Emir’den almadım, Mustafa b. Mehmed ve Hamza b. Hızır biz şâhidleriz ve şehâdet ederiz bize ikrâr edip on bin akçe mezbûr müteveffâ Emir’den karz aldım idi ve on bin akçe mezbûr Ali’den aldım idi ba‘dehu ibrâ ve iskāt edip hüccet aldım dedikde deyû ikrâr ettin dedikde ba‘dehu muslihûn araya girip on bin iki yüz akçeye sulh ve ibrâ ettirip mezbûr Nikola bedel-i ibrâ on bin akçeyi verdim da‘vâdan ve nizâ‘dan ferâgat ettim ve eğer [da‘vâ] edersem inde’l-hükkâm mesmû‘ olmaya dedikde mezbûr Ali bi’l-muvâcehe tasdîk edip cem‘an yedi bin akçe taleb ettim idi sulh ve ibrâ edip on bin iki yüz akçeye aldım kabûl ve kabz ettim min ba‘d husûs-ı kazıyyeye müte‘allik da‘vâm ve nizâ‘ım yoktur dedikde tarafeynden sâdır olan ikrârları şer‘an mu‘teber görülüp sıhhat-i ibrâya ve sulha hükm olundu ki bi’t-taleb sicil olundu. Vaka‘a’t-tahrîr fî evâili Rebî‘ilevvel sene 953. Şuhûdü’l-hâl: el-Hâc Süleyman b. Mehmed, Eynehan b. Osman, Karaca b. Yusuf, Mahmud Bey b. Abdullah er-Râcil, Kara Yusuf b. Abdullah, Kosta b. Markova, Mihal b. Kosta, Yani b. Todora, Mihal b. Yani, Nikola b. Poli, Kosta Kakuzi b. Manol ve gayruhüm.