Üsküdar Mahkemesi 14 Numaralı Sicil (H.953-955/ M. 1546-1549) cilt: 5, sayfa: 242 Hüküm no: 511 Orijinal metin no: [70a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Câbi Hasan b. Hızır’ın Kadıköy’ün vergilerinin mukâtaasını Mihal b. Yorgi’ye verdiği Vech-i tezkire oldur ki Merhûm ve mağfûrun-leh Sultân Selîm Hân aleyhi’r-rahmeti ve’r-rıdvân mahrûse-i İslâmbol’da vâki‘ olan câmi‘i evkāfından karyeti Kadı’ya câbi olan Hasan b. Hızır şer‘-i şerîf meclisine hâzır olup eyitdi ki câbisi olduğum karyeleri öşr-i şer‘iyyelerin ve rüsûm-ı örfiyyelerin ve tapu-yı zemîn ve beytülmâl ve mâl-ı gāibi ve kaçkının bey‘ etmesin bile olmak şart üzerine cüz’î ve küllî vakfa âid olan hukūkun karye-i Kadı’dan işbu sâhibü’s-sicil Mihal b. Yorgi’ye sene selâse ve hamsîne ve tis‘a mi’e Muharremi gurresinden bir senesin ber vech-i maktû‘ altmış iki bin akçeye verdim dedikde mukırr-ı mezbûru mukarrun lehü’l-mezkûr Mihal vicâhen ve şifâhen cemî‘ ikrâr-ı meşrûhunda vicâhen ve şifâhen tasdîk ettikden sonra sıhhat-i mukāta‘a mukarrer olup ve zarar-ı malına karye-i Bulgurlu’dan Ahmed b. Halil kefîl bi’l-mâl olup bi’t-taleb sicil olundu. Vaka‘a’t-tahrîr fî evâili Cemâziyelevvel sene 953. Şuhûdü’l-hâl: Eynehan b. Osman, (__) b. (__) ve Ali b. Abdullah, (__) b. (__), Şaban b. Ali, İlyas b. Hüseyin, Durbâli b. Gaybî.