Üsküdar Mahkemesi 14 Numaralı Sicil (H.953-955/ M. 1546-1549) cilt: 5, sayfa: 259 Hüküm no: 562 Orijinal metin no: [75b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdullah Ağa Vakfı’na bağlı bahçeleri azatlı kölelerin tasarruf etmeyip kiraya verdikleri Vech-i tahrîr-i sicil budur ki Merhûm Abdullah Ağa evkāfına nâzır olan Süleyman b. Hamza meclis-i şer‘a hâzır olup eyitdi ki merhûm Abdullah Ağa’nın İstavros nâm [karye] kurbunda vâki‘ olan bağçeleri utekāsı tasarruf edip sülüsün vakfa ve sülüsân utekānın olmak üzre şart edip hâliyâ utekā tasarruf etmeyip âharlara icâreye verilip cem‘an vakıf için taleb ederim dedikde vakfiyesine nazar olunup utekā tasarruf edip, sülüsün vakfa verip ve sülüsân utekānın olmak üzre meşrût olup hilâf-ı şart-ı vakıf olmağın cem‘an bağçeler vakıf için zabt olmağa hükm olunup bi’t-taleb kayd olundu. Vaka‘a’t-tahrîr fî evâhiri Rebî‘ilevvel sene hamse ve hamsîne ve tis‘a mie. Şuhûdü’l-hâl: Rüstem b. Yusuf es-Silâhî, Abdi b. el-İmâm, Memi Şah b. Murad, Ali b. V[eli], Turgud b. Hasan ve gayruhüm.