Üsküdar Mahkemesi 14 Numaralı Sicil (H.953-955/ M. 1546-1549) cilt: 5, sayfa: 260 Hüküm no: 565 Orijinal metin no: [76a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Todora b. Yani’nin yaralanan öküzünün bedeli Vech-i tahrîr-i sicil budur ki Nebi b. Burhan şerî‘at mahfilinde Todora b. Yani muvâcehesinde takrîr-i da‘vâ kılıp eyitdi ki benim sığırım ra‘y ederken bir öküzünün bir ayağı mecrûh olup nice müddet amelden kalsa ba‘dehu mezbûr Nebi öküz[e] zarar vardır, fetvâyü’ş-şerîf getirip mecrûh olmak taksîrâtdır dedikde mezbûr Todora zarar oldukdan sonra ayağı onulup ba‘dehu öküzü kullandık sen kabûl ettin deyip ve öküzün bahâsın kabûl etmeyip Hayrân Abdi b. Hasan ve Pîrî b. Üveys ve Mehmed b. Hamza nâm kimesneler biz şâhidleriz ve şehâdet ederiz mezkûr öküzün kıymeti beş yüz akçe eder deyû şehâdet ettiklerinde bi’t-taleb sicil olundu. Vaka‘a’t-tahrîr fî evâsıtı Recebi’l-mürecceb sene 955. Şuhûdü’l-hâl: Ali b. Yahya, Ramazan b. Hüseyin, Çırak Mahmud b. Mehmed ve gayruhüm.