Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 440 Hüküm no: 496 Orijinal metin no: [68b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Hüseyin b. Ferruh’un veresesine intikal eden vakıf arsa üzerine kızı Havvâ ile kocasının yaptıkları binanın kıymetinin tesbiti ile vârislerin binadaki hisselerinin ifrazı Husûs-ı âti’l-beyânın mahallinde keşf ü tahrîr ve takvîm ü taksîmi bâbında sâdır olan fermân-ı şerîfe imtisâlen taraf-ı şer‘den irsâl olunan Mevlânâ Ali Efendi b. Sunullah hâssa mi‘mârlardan Küçük Mehmed Halîfe b. Ali ve Hüseyin Halîfe b. Ali ile mahmiye-i İstanbul’da Süleymâniye Câmi‘-i şerîfi ve maʻbed-i latîfi kurbünde Kâtib Şemseddin Efendi Mahallesiʼnde sâkin iken bundan akdem vefât eden el-Hâc Hüseyin b. Ferruh’un kebîr oğlu Hasan Beşe ve kebîre kızları Havvâ ve Afife ve Âişe nâm kimesnelerin menzillerine varıp zeyl-i kitâbda mektûbü’l-esâmî Müslimîn huzûrunda akd-i meclis-i şer‘-i âlî eyledikde mezkûre Havvâ meclis-i ma‘kūd-ı mezkûrda karındaşları mezkûrûn Hasan Beşe ve Afife ve Âişe mahzarlarında merhûm Kâtib Şemseddin Vakfı’na hâlâ câbî ve kāimmakām-ı mütevellî olan Mustafa Çelebi b. Mehmed hâzır olduğu hâlde takrîr-i kelâm edip babam müteveffâ-i mezkûr hayâtında ve kemâl-i akl-ı sıhhatinde vakf-ı mezkûrdan olup taht-ı tasarrufunda olan bir mikdâr arsa-yı hâliye üzerine kendi mâlıyla binâ edip binâsı kendinin olmak üzere zevcim işbu hâzır bi’l-meclis Mustafa Beşe b. Mehmed’e izin vermekle biz dahi mâlımız ile işbu mu‘âyene olunan tahtânî bir oda ve fevkānî bir oda ve dehlîz ve kenîf binâ etmekle binâsı ber-vech-i muharrer bizim ve arsası babam müteveffâ-i mezkûrdan intikāl-ı âdî ile sâir veresesine ve bana intikāl etmeğin hâlâ verese-i mezkûrûn beynlerinde alâ-sebîli’l-hıfz ve’l-imâre lâ-a‘lâ-sebîli’t-temlîk ve’t-temellük taksîm ve ifrâz ve alâmât-ı fâsıla vaz‘ıyla birbirinden mümtâz kılındıkdan sonra kendi mâlımız ile ettiğimiz binâ keşf ve takvîm olunmak murâdımdır dedikde mi‘mârân-ı mezkûrân mesâha eyledikleri üzere tûlen sekiz buçuk ve arzen beş buçuk bi-hesâb-ı terbî‘î kırk altı zirâ‘ kendi binâları tahtında olan arsa üzerine mezkûrûn Hasan Beşe ve Afife ve Âişe’ye ta‘yîn ve tahsîs olunan tarafında kendi dehlîzleri tahtında tûlen altı zirâ‘ ve arzen bir buçuk <> bi-hesâb-ı mezkûr dokuz zirâ‘ arsa dahi zam ve ilhâk olunup mezkûre Havvâ’nın hissesine ta‘yîn ve tahsîs ve bâkī binâ ve arsa mezkûrûn Hasan Beşe ve Afife ve Âişe’nin hisselerine tahsîs ve ta‘yîn ve her biri hüsn-i rızâlarıyla hisse-i mu‘ayyene-i müfrezelerini kabûl ve âharın hissesine müte‘allika âmme-i da‘vâdan her biri âharın zimmetini ibrâ ve iskāt eylediklerinden sonra mezkûr Havvâ ve zevci mezkûr Mustafa Beşe’nin kendi binâları mesâha ve takvîm olundukda bi-hesâb-ı mezkûr kırk altı zirâ‘ arsa üzerinde mebnî sakf ve tavan ve gülvi? ve taş duvar ve dolma duvarın zirâ‘ı ikişer yüz akçeden dokuz bin iki yüz akçe ile ancak husûle gelir deyü mi‘mârân-ı mezkûrân ile Müslimîn-i mezkûrîn icmâ‘ ve ittifâk eylediklerini mevlânâ-yı mezkûr mahallinde ketb ü tahrîr edip ba‘dehû ma‘an ba‘s olunan el-Hâc Hüseyin b. Abdullah ve diğer Hüseyin b. Hasan ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 26 min-Recebi’l-ferd sene 1121 Şuhûdü’l-hâl: Molla Ömer b. Mustafa el-Kayyum, Osman Odabaşı b. Ali, İmâm Mehmed Efendi b. Mahmud, Mustafa Odabaşı b. İbrahim, Mehmed Efendi b. Maksud el-Müezzin, Veli Beşe b. Hasan, Ahmed Çelebi b. Mustafa ve gayruhum mine’l-huzzâr.