Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 438 Hüküm no: 495 Orijinal metin no: [68a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Meremmetçi zevcesi Ayşe Hatun Vakfı’nın mütevellîsi Yusuf b. Abdullah’ın vakfın hesaplarında eksik görülen parayı bir önceki mütevellîden tahsil edilmesi davasında haksız bulunduğu Mahmiye-i İstanbul’da vâki‘ Meremmetci zevcesi Âişe Hatun Vakfı’na mütevellî olan Yusuf b. Abdullah nâm kimesne mahfil-i kazâda vakf-ı mezbûra sâbıkā mütevellî olan Mustafa Efendi b. Mehmed mahzarında bi’t-tevliye üzerine da‘vâ ve tasvîr-i müdde‘â edip mütevellîsi olduğum mezbûre Âişe Hatun Vakfı’ndan altı yüz doksan guruşu zâyi‘ olmağla benden mukaddem mütevellî olan Mustafa Efendi’ye suâl olunup takrîri tahrîr ve hüccet olunmak matlûbumdur dedikde gıbbe’s-suâl mezbûr Mustafa Efendi cevâbında Mekke-i mükerreme kazâsından ma‘zûlen gelir iken Şâm-ı şerîf’de vefât eden merhûm Kadri Efendizâde Abdullah Efendi bundan akdem mütevellî olan Abdülbâki Efendi yedinden bin yüz bir senesi Muharrem’inde mâl-ı vakf-ı mezbûrdan altı yüz doksan guruş istidâne ve kabz edip mukābelesinde Kadıçeşmesi kurbünde vâki‘ menzilinin hâriciyesinde başka müfrez mülk bahçesini yüz bir senesi Muharrem’inde bi-tarîkı’l-istiğlâl rehin vaz‘ ve teslîm ettiğinden sonra mezkûr Abdullah Efendi meblağ-ı mezbûru kable’l-edâ fevt oldukda mezbûr Abdullah Efendi’nin li-ebeveyn kız karındaşı Afife Hatun Vakfı’na mütevellî olan Hüseyin Efendi b. Abdurrahman nâm kimesne yedinde olan hüccet nâtıka olduğu üzere müteveffâ-i mezbûr Abdullah Efendi bundan mukaddem mezbûre Afife Hatun Vakfı’na mütevellî olan el-Hâc Hüseyin Efendi b. Ahmed nâm kimesneden mezbûre Afife Hatun Vakfı’ndan yedi yüz guruş istidâne [68b] ve hâriciye tâʻbir olunur büyût-ı adîde ve üç bahçeyi müştemil menzilini bin doksan yedi senesi Muharrem’inde rehin vaz‘ eylediği merhûm-ı mezbûr Abdullah Efendi’nin vasîsi Mehmed Efendi b. Mustafa mahzarında huzûr-ı hâkimde da‘vâ ve isbât ve hükmolunup Meremmetci Vakfı’na rehin olan bahçe dahi hâriciyede dâhil olmağla mezbûre Afife Hatun mütevellîsi kabz etmekle mezbûre Âişe Hatun Vafkı’ndan olan meblağ-ı mezbûr altı yüz doksan guruş bu vechile zâyi‘ olmağla bana damân lâzım gelmez deyü mazmûnu takrîrine muvâfık hüccet ibrâz ettiğinden mâ‘adâ hâlâ şeyhülislâm olan a‘lemü’l-ulemâi’l-mütebahhirîn hallâlü’l-müşkilâti’d-dîniyye keşşâfü’l-mu‘dilâti’l-yakīniyye sa‘âdetlü Abdullah Efendi hazretlerinin unvânlarıyla mu‘anven ve imzâları ile mümzât bir kıt‘a fetvâ-yı şerîfe ısdâr edip mazmûn-ı münîfinde ancak rehin ile istirbâhı meşrûta olan nukūdun mütevellîsi Zeyd nukūd şu kadar akçeyi melî olan Amr’a mu‘âmele ile verdikde Amr’dan kıymeti deyne müsâvî olan mülk menzilini rehin oldukdan sonra Amr düyûnu terekesinden ezyed olduğu hâlde fevt olup menzil-i merkūmenin müstehak çıkıp baʻde’l-isbât ve’l-hükm menzil-i mezbûrdan almağa meblağ-ı mezbûrun bir mikdârı zâyi‘ olsa Zeyd’e damân lâzım olur mu deyü istiftâ olundukda cevâb-ı bâ-savâblarında olmaz deyü buyrulmağın ber-mûceb-i fetvâ-yı şerîfe müdde‘î-i mezbûr Yusuf bî-vech müdâhaleden men‘-birle mâ-vaka‘a bi’t-taleb ketb olundu. Fî-evâsıtı Cumâdelâhire sene 1121 Şuhûdü’l-hâl: Mustafa b. Şa‘ban, Hasan b. Mustafa, Mehmed b. Ahmed, Ahmed b. Osman, Ali b. İvaz, es-Seyyid Mehmed Efendi b. Osman, Veli Efendi b. es-Seyyid Mehmed Mustafa, Abdüllatif Efendi b. Abdurrahman, Yusuf b. Abdullah, Hazinedâr Mehmed, Ahmed Efendi b. Abdülbâki ve gayruhum mine’l-huzzâr.