Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 441 Hüküm no: 498 Orijinal metin no: [68b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadice bt. Mehmed’in geçinemediği kocası Mustafa b. Mustafa’dan boşandığı Mahmiye-i İstanbul’da Avratpazarı kurbünde Oymaoyma? odalarında sâkine olup zâtı Mehmed b. Abdullah ve Osman b. Abdullah nâm kimesne[ler] ta‘rîfleriyle mu‘arrefe Hadice bt. Mehmed nâm hatun meclis-i şer‘-i şerîf-i enverde zevc-i dâhili işbu râfi‘u’l-kitâb Mustafa b. Mustafa mah[zarında] ikrâr ve takrîr-i kelâm edip zevcim mezbûr Mustafa ile beynimizde hüsn-i zindegānemiz olmamağla zimmetinde mütekarrer ve ma‘kūdün-aleyh olan bin sekiz yüz akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr Mustafa ile muhâla‘a-i sahîha-i şer‘iyye ile muhâla‘a eylediğimde ol dahi ber-vech-i muharrer hul‘-ı mezbûru kabûl eylediğinden [sonra] hukūk-ı zevciyete müte‘allika âmme-i da‘vâdan her birimiz âharın zimmetini ibrâ-i âmm-ı kātı‘u’n-nizâ‘la ibrâ ve iskāt eyledik dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 28 min-Recebi’l-mürecceb sene 1121 Şuhûdü’l-hâl: Mustafa Çelebi b. Şa‘ban, Hasan b. Mustafa, Ali b. İvaz, Abdülkerim b. Ahmed, Mehmed b. Ahmed, Ahmed b. Osman, Ali b. Bâli, Ali b. Abdullah ve gayruhum mine’l-huzzâr.