Üsküdar Mahkemesi 17 Numaralı Sicil (H.956-963/ M.1549-1556) cilt: 6, sayfa: 84 Hüküm no: 68 Orijinal metin no: [8a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mihal b. Yani’nin Yorgi b. Manol’e yer sattığı Vech-i tahrîr-i sicil budur ki Karye-i Maltepe’den Yorgi b. Manol ve Mihal b. Yani meclis-i şer‘a hâzırân olduklarında mezbûr Yorgi takrîr-i da‘vâ kılıp eyitti ki bir kıt‘a yer ki hudûd bi’t-tarîkı’l-hâs ve bi-mülki Dimitraki ve bi-mezrû‘âti ve bi-kûrüm-i Kosta bi-cümleti’l-hudûd [ve]’l-hukûk mi’ede dirhem dedikde mezbûr Mihal inkâr edip gıbbe’l-inkâr mezbûr Yorgi’den beyyine taleb olunup Kosta b. Simoz ve Yorgi b. Simoz ve Fotinoz b. Yani ve Manol b. Todora nâm zimmîler dediler ki bizim huzûrumuzda mezbûr Mihal ikrâr ve i‘tirâf etti, mezkûr yeri mezbûr Yorgi’ye yüz akçeye bey‘ ettim deyû ikrârına şehâdet ettiklerinde ba‘de’t-tezkiyye mezkûr yer mezbûr Yorgi’nin idiğine hükm olundu, bi’t-taleb sicil olundu. Vaka‘a’t-tahrîr fî evâsıtı Saferi’l-muzaffer sene 956. Şuhûdü’l-hâl: Süleyman b. Davud, Ramazan b. Hüseyin, Ali b. Hacı, Dimitri b. Tıranoz, Yani b. Tıranoz ve gayruhüm.