Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 57 Hüküm no: 47 Orijinal metin no: [9b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saraknos’un evini damadı Kosta’ya sattığı Medîne-i Üsküdar’a muzâfe Adalar nâhiyesine tâbi‘ Pendik karyesinde mütemekkin Saraknos v. Mihal nâm zimmî meclis-i şer‘-i şerîfde işbu bâ‘isü’s-sifr dâmâdı Kosta v. Todori ve kızı Kiryakiye mahzarında bi tav‘ihi ikrâr ve takrîr-i kelâm edüp akd-i âti’z-zikrin sudûruna değin silk-i mülkümde münselik olup karye-i mezbûrede vâki‘ bir tarafı Aci Mihal menzili ve bir tarafı kendü menzilim ve bir tarafı dâmâdı[m] Kosta menzili ve bir tarafı tarîk-i âm ile mahdûd fevkānî iki bâb oda ve vasatında iki bâb oda ve tahtında bir ahır ve bir kenîfi müştemil mülk menzilimin fevkānî bir oda vasatında bir oda ve nısf ahırı dâmâdım Kosta’ya ve nısfı fevkānî bir oda vasatında bir bâb oda ve nısf ahırı cemî‘ tevâbi‘ ve levâhıkıyla ve kâffetü’l-hukūk [ve] merâfıkı ile tarafeynden îcâb ve kabûlü hâvî bey‘-i bâtt-ı kat‘î ile yalnız üç yüz guruşa merkūmâna bey‘ u teslîm eyledim onlar dahi minvâl-i muharrer üzere iştirâ ve tesellüm ve kabz eyleyüp ba‘de’l-yevm menzil-i mahdûd-ı mezkûrda benim kat‘â alâka ve medhalim kalmayup dâmâdım ile kızım nâm kimesnelerin mülk-i müşterâsıdır dedikde keyfe mâ yeşâ ve yehtâr mutasarrıf ve mutasarrıfe olsunlar yedlerine hüccet i‘tâ olunsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Tahrîren fi’l-yevmi’t-tâsi‘ aşer min-şehri Cemâziyelevvel li-sene tis‘a ve seb‘în ve mi’ete ve elf. Şuhûdü’l-hâl: Serdâr-ı sâbık Mehmed, Ahmed Ağa, İmam Kasım Efendi, Osman Ağa. İstefar v. Hıristodori, Yorgaki v. Kuriş, Frankovilo v. Yamandi, Kostandi v. Kanula.