Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 58 Hüküm no: 48 Orijinal metin no: [10a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mitro’nun arsasını Kasap Uskolya’ya sattığı Medîne-i Üsküdar’a muzâfe Adalar nâhiyesine tâbi‘ Pendik nâm karyede mütemekkin Mitro v. Polihron meclis-i şer‘-i hatîr-i lâzımü’t-tevkīrde işbu râfi‘ü’r-rakīm Kasab Uskolya v. Zafiri zimmî muvâcehesinde bi-tav‘ihi ikrâr ve takrîr-i kelâm edüp akd-i âti’z-zikrin sudûruna değin yedimde mülküm olup karye-i mezbûrede vâki‘ bir tarafı Yamandaki menzili ve bir tarafı kilise menzili ve bir tarafı mesfûr ile iştirâk duvar ve bir tarafı tarîk-i âm ile mahdûd tûlen ve arzen bi-hesâb-ı terbî‘î tahmînen elli zirâ‘ cânib-i etrâfı taş duvarıyla mülk menzil arsamı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile müşterî-i merkūma elli sekiz guruşa bey‘ u teslîm ve temlîk eylediğimde ol dahi ber-vech-i muharrer iştirâ ve tesellüm ve temellük ve kabz u kabûl edüp semeni olan meblağ-ı mezbûr elli sekiz guruşu müşterî-i mersûm yedinden bi’t-tamâm ve’l-kemâl ahz ü kabz eyledim fîmâ-ba‘d arsa-i mahdûd-ı mezkûrda vechen mine’l-vücûh ve sebeben mine’l-esbâb kat‘â ve kātıbeten benim alâka ve medhalim kalmayup müşterî-i merkūm Uskolya zimmînin mülk-i müşterâsı ve hakk-ı sırf-ı sahîhi olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Tahrîren fi’l-yevmi’s-sâmin min-Cemâziyelâhir li-sene tis‘a ve seb‘în ve mi’ete ve elf. Şuhûdü’l-hâl: Değirmenci Kirkor, Semeroğlu? Yamandaki, Aci Yorgaki v. Nikifor, Dimitri v. Litare?, İlya v. Letare, Kostandi v. Aci Kanbolo, Macaroğlu Frankovilo.