Üsküdar Mahkemesi 17 Numaralı Sicil (H.956-963/ M.1549-1556) cilt: 6, sayfa: 161 Hüküm no: 312 Orijinal metin no: [32b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Elida b. Manol’deki hissenin Mihal b. Nikola’ya tapulandığı Vech-i tahrîr-i sicil budur ki Karye-i Çengel’e hâliyâ âmil olanlardan Bendelyos b. Yani ve Manol b. Nikola meclis-i şer‘a hâzırân olduklarında takrîr-i kelâm kılıp eyitdiler ki Elida b. Manol fevt olup evlâd-ı zükûrdan Yani ve Dimitri kalıp çift sürür yeri onlara intikāl edip ba‘dehû mezbûr Yani dahi fevt olup evlâd-ı zükûru kalmayıp kānûn üzere hissesi tapuya müstahak olup bir kıt‘a hâlî yeri ki hudûd iki taraf tarîk-ı âmma ve bir taraf Yani ve Yamak ve bir taraf Mihal yerine muttasıl olan yerin nısfın işbu sâhibü’s-sicil Mihal b. Nikola’ya yüz akçeye tapuya verdim dediklerinde mezbûr Mihal vicâhen tasdîk ettikden sonra sıhhat-i akd-i tapu mukarrer olup bi’t-taleb kayd olundu. Vaka‘a’t-tahrîr fî evâhiri Şevvâli’l-mükerrem sene 956. Şuhûdü’l-hâl: Yani b. Mercil, Mihal b. Soturi, Hıristodoros b. Kazgancı, Kosta b. Koçi, Dimitri b. Tıranoz